मकाओमा अन्तर्राष्ट्रिय युवा नृत्य महोत्सव शुरु, ८०० भन्दा बढी कलाकार सहभागी
ड्रागन मिडिया समाचार कक्ष
चीनको मकाओ विशेष प्रशासनिक क्षेत्रमा ‘अन्तर्राष्ट्रिय युवा नृत्य महोत्सव–२०२६’ शुरु भएको छ। विश्व सम्पदा क्षेत्र सेन्ट पल चर्चको भग्नावशेषबाट शनिबार शुरु भएको उद्घाटन परेडमा ३३ समूहका ८०० भन्दा बढी स्थानीय तथा अन्तर्राष्ट्रिय युवा नृत्य कलाकार सहभागी भए।
परेड सेन्ट पल क्षेत्रबाट विभिन्न ऐतिहासिक सडक हुँदै सेनाडो स्क्वायरसम्म पुगेको थियो। कलाकारहरूले मार्गमा विविध नृत्य प्रस्तुत गर्नुका साथै स्थानीय बासिन्दा र पर्यटकसँग अन्तरक्रिया गरेका थिए।
‘नृत्यमय युवा, उदाउँदो भविष्य’ मूल विषय रहेको महोत्सवमा मकाओ र हङछिनका विभिन्न स्थानमा सामूहिक आकस्मिक नृत्य प्रस्तुति, खुला तथा सभाकक्षीय कार्यक्रम, कलासम्बन्धी कार्यशाला, प्रवर्द्धनात्मक गतिविधि र फोटो प्रतियोगिता आयोजना गरिनेछ। महोत्सव जुलाई २३ सम्म सञ्चालन हुनेछ।
चीनको सिचुवान प्रान्तबाट सहभागी कलाकार चोउ चिहाओले मकाओको आफ्नो पहिलो भ्रमणमा छ्याङ जातिको परम्परागत नृत्य अन्तर्राष्ट्रिय दर्शकमाझ प्रस्तुत गर्न पाउनु खुसीको विषय भएको बताए।
उनले महोत्सवले परम्परागत संस्कृतिलाई विश्वसामु चिनाउनुका साथै विभिन्न देशका कलाकारबीच कलात्मक अनुभव आदानप्रदान गर्ने महत्वपूर्ण अवसर उपलब्ध गराएको उल्लेख गरे।
ग्रीसको एथेन्सबाट सहभागी अलेक्जान्ड्रोस टोमारसले मकाओका युवासँगै नृत्य प्रस्तुत गर्दा फरक महादेश र संस्कृतिका मानिससँग सम्बन्ध स्थापित गर्ने अवसर प्राप्त भएको बताए।
विश्वका मानिसको जीवनशैली फरक भए पनि नृत्यले सबैलाई जोड्ने उनको भनाइ थियो। पहिलोपटक एसिया भ्रमण गरेका टोमारसले यस सांस्कृतिक आदानप्रदानलाई सुन्दर अनुभवका रूपमा वर्णन गरे।
मकाओ विशेष प्रशासनिक क्षेत्र सरकारको शिक्षा तथा युवा विकास ब्यूरोद्वारा आयोजित महोत्सवलाई नगर मामिला ब्यूरो, मकाओ सरकारी पर्यटन कार्यालय, सांस्कृतिक मामिला ब्यूरो, खेलकुद ब्यूरोलगायत विभिन्न निकायले सहआयोजना गरेका छन्। आयोजकका अनुसार महोत्सवले नृत्यमार्फत विभिन्न देश र क्षेत्रका युवाबीच मित्रता, सांस्कृतिक समझदारी र कलात्मक सहकार्य विस्तार गर्ने लक्ष्य राखेको छ।
