चीनको कृषि हरित विकासमा निरन्तर सुधार

ड्रागन मिडिया समाचार कक्ष

चीनमा पानीको बचत, रासायनिक मल तथा कीटनाशकको प्रभावकारी प्रयोग र बालीको पराल पुनःउपयोग विस्तारसँगै कृषि क्षेत्रको हरित विकासमा निरन्तर सुधार भएको छ।

चिनियाँ कृषि विज्ञान प्रतिष्ठान र चीन कृषि हरित विकास अनुसन्धान समाजले शनिबार सार्वजनिक गरेको ‘चीन कृषि हरित विकास प्रतिवेदन–२०२५’ अनुसार कृषि उत्पादनलाई स्रोत–कुशल र वातावरणमैत्री बनाउने प्रयासमा चीनले उल्लेख्य प्रगति गरेको हो।

सन् २०२५ को अन्त्यसम्म अन्न तथा तेलहन बालीमा पानी र मलको एकीकृत प्रयोग प्रविधि विस्तार गरिएको क्षेत्र ५८ लाख ६० हजार हेक्टरभन्दा बढी पुगेको छ। पछिल्लो एक दशकमा चीनको वार्षिक कृषि पानी खपत ५.७ प्रतिशतले घटेको प्रतिवेदनमा उल्लेख छ।

धान, गहुँ र मकै गरी तीन प्रमुख अन्नबालीमा रासायनिक मल उपयोग दर सन् २०२५ मा ४३.३ प्रतिशत पुगेको छ। यो सन् २०२० को तुलनामा ३.१ प्रतिशत बिन्दुले बढी हो।

ती बालीमा कीटनाशक उपयोग दर पनि सन् २०२० को तुलनामा ४.४ प्रतिशत बिन्दुले बढेर ४५ प्रतिशत पुगेको छ। देशभर बालीबाट निस्कने परालको समग्र पुनःउपयोग दर ८८ प्रतिशतभन्दा माथि कायम रहेको प्रतिवेदनले जनाएको छ।

चिनियाँ कृषि विज्ञान प्रतिष्ठानअन्तर्गत कृषि स्रोत तथा क्षेत्रीय योजना संस्थानका निर्देशक उ वनपिनले आधिकारिक तथ्याङ्कमा आधारित प्रतिवेदनले चीनको कृषि हरित विकाससम्बन्धी प्रमुख कार्यक्रम, क्षेत्रीय अभ्यास र सफल नमुनाको समग्र विवरण प्रस्तुत गरेको बताए।

सन् २०१९ देखि वार्षिक रूपमा प्रकाशन हुँदै आएको यो प्रतिवेदन चीनको कृषि क्षेत्रलाई उत्पादनमुखी मात्र नभई स्रोत संरक्षण, वातावरणीय सुरक्षा र दिगो विकाससँग जोड्ने प्रक्रियाको महत्वपूर्ण सूचक बनेको छ।