क्यानडामा डढेलो संकट तीव्र, ९७१ स्थानमा आगो सक्रिय
ड्रागन मिडिया समाचार कक्ष
क्यानडाका प्रधानमन्त्री मार्क कार्नीले देशको इतिहासकै सबैभन्दा तीव्र डढेलो मौसममध्ये एकको सामना गर्न सबै सरकारी निकाय, सुरक्षा संयन्त्र र उपलब्ध श्रोतलाई समन्वित रूपमा परिचालन गरिएको बताएका छन्।
शनिबार सामाजिक सञ्जालमार्फत वक्तव्य जारी गर्दै कार्नीले उत्तरपश्चिमी ओन्टारियोको अवस्था विशेष रूपमा विनाशकारी बनेको उल्लेख गरे। त्यस क्षेत्रका १० भन्दा बढी समुदायलाई सुरक्षित स्थानमा सारिएको उनले जानकारी दिएका छन्।
प्रधानमन्त्री कार्नीका अनुसार देशभर पाँच हजार ३०० भन्दा बढी अग्निनियन्त्रक परिचालन गरिएका छन् भने डढेलो नियन्त्रण, उद्धार र निगरानीका लागि झण्डै ३०० विमान प्रयोग भइरहेका छन्।
क्यानडाले आगलागीको वास्तविक समयमै पहिचान, जोखिम मूल्याङ्कन र नियन्त्रणका लागि तथ्याङ्क, ड्रोन, नयाँ प्रविधि र उन्नत तापीय चित्रण प्रणालीको प्रयोग बढाएको पनि उनले बताएका छन्।
अत्यधिक गर्मी र लामो खडेरीका कारण देशव्यापी डढेलो संकट तीव्र रूपमा फैलिरहेका बेला प्रधानमन्त्री कार्नीको वक्तव्य आएको हो।
क्यानाडियन इन्टरएजेन्सी फरेस्ट फायर सेन्टरका अनुसार क्यानडाको राष्ट्रिय पूर्वतयारी स्तर चारमा पुर्याइएको छ। यो स्तरले विभिन्न प्रान्त र क्षेत्रबीच ठूलो मात्रामा साझा जनशक्ति, विमान तथा अग्निनियन्त्रण उपकरण परिचालन आवश्यक भएको जनाउँछ।
पछिल्लो तथ्याङ्कअनुसार यस वर्ष क्यानडाभर तीन हजार ८३९ वटा डढेलोका घटना अभिलेख गरिएका छन्। आगलागीबाट २९ लाख हेक्टरभन्दा बढी वन क्षेत्र प्रभावित भइसकेको छ।
शनिबारसम्म देशभर ९७१ वटा डढेलो सक्रिय रहेकोमा २३९ वटा पूर्ण रूपमा नियन्त्रणबाहिर रहेको जनाइएको छ।
उत्तरी ओन्टारियो डढेलो संकटको प्रमुख केन्द्र बनेको छ। त्यस क्षेत्रमा मात्रै करिब १९० स्थानमा आगो सक्रिय छ। डढेलो तीव्र रूपमा फैलिँदा विभिन्न आदिवासी समुदायलाई सुरक्षित स्थानमा सारिएको छ।
आगलागीबाट निस्किएको बाक्लो धुवाँ दक्षिणतर्फ फैलिँदा अमेरिकाका विभिन्न ठूला शहरको वायु गुणस्तरसमेत गम्भीर रूपमा प्रभावित भएको छ। सम्बन्धित निकायहरूले ती क्षेत्रमा स्वास्थ्यसम्बन्धी चेतावनी जारी गरेका छन्।
