शुक्लाफाँटा निकुञ्जमा च्याउ टिप्न गएका १४ महिला सम्पर्कविहीन
ड्रागन मिडिया समाचार कक्ष
कञ्चनपुरको भीमदत्त नगरपालिका–१९ बागफाँटाका १४ महिला शुक्लाफाँटा राष्ट्रिय निकुञ्जमा च्याउ टिप्न गएपछि सम्पर्कविहीन भएका छन्।
आइतबार बिहान निकुञ्ज प्रवेश गरेका उनीहरू साँझसम्म घर नफर्किएपछि परिवार र स्थानीयवासीले प्रहरीलाई जानकारी दिएका थिए।
जिल्ला प्रहरी कार्यालय कञ्चनपुरका प्रवक्ता प्रहरी नायब उपरीक्षक टेकबहादुर रावतका अनुसार दशरथ टोलका महिलाहरू बिहान करिब ११ बजे पाँच र नौ जनाको दुई समूहमा निकुञ्जतर्फ गएका थिए। उनीहरू मालुमेला पोस्ट हुँदै निकुञ्ज प्रवेश गरेको खुलेको छ।
सम्पर्कविहीन हुनेमा सविता चौधरी, सानु चौधरी र सुमित्रा सुनारलगायत छन्। अन्य महिलाको विवरण परिवारसँग समन्वय गरी प्रमाणीकरण भइरहेको प्रहरीले जनाएको छ।
महिलाहरू निर्धारित समयमा घर नफर्किएपछि आइतबार साँझदेखि खोजी शुरु गरिएको हो। प्रहरीको प्रारम्भिक अनुमानअनुसार च्याउ खोज्ने क्रममा निकुञ्जको भित्री क्षेत्रमा पुगेका उनीहरूले बाटो बिराएको हुन सक्छ।
जिल्ला प्रहरी कार्यालयका प्रहरी निरीक्षक नेत्रमणि गिरीका अनुसार नेपाली सेना, नेपाल प्रहरी र स्थानीयवासीको संयुक्त टोली खोजीमा परिचालित भएको छ। खोजी अभियानको नेतृत्व गर्न डीएसपी रावत पनि घटनास्थल पुगेका छन्।
अहिलेसम्म सम्पर्कविहीन महिलाहरूसँग कुनै सम्पर्क स्थापित हुन नसकेको प्रहरीले जनाएको छ। उनीहरूको खोजीलाई निकुञ्जभित्र तीव्र बनाइएको छ।
यसैबीच, आइतबारदेखि सम्पर्कविहीन भएका बेलडाँडी गाउँपालिकाका तीन महिला भने सोमबार बिहान सकुशल सम्पर्कमा आएका छन्।
शुक्लाफाँटा राष्ट्रिय निकुञ्जभित्र यसअघि पनि बाटो बिराएका व्यक्तिको सुरक्षा निकायले उद्धार गरेका घटना छन्। गत फेब्रुअरीमा निकुञ्जको बाबा ताल क्षेत्रमा हराएका तीन किशोरीलाई नेपाली सेनाको टोलीले उद्धार गरेको थियो।
