दक्षिण चीन सागर आचारसंहितालाई शीघ्र निष्कर्षमा पुर्याउन वाङ यीको आग्रह
ड्रागन मिडिया समाचार कक्ष
चिनियाँ विदेशमन्त्री वाङ यीले दक्षिण चीन सागरसम्बन्धी आचारसंहिताको परामर्श प्रक्रिया शीघ्र निष्कर्षमा पुर्याउँदा क्षेत्रीय शान्ति र स्थिरता संरक्षण गर्न सहयोग पुग्ने बताएका छन्।
फिलिपिन्सको राजधानी मनिलामा मङ्गलबार मलेसियाली विदेशमन्त्री मोहम्मद हसनसँग भएको भेटमा वाङले आचारसंहिताले क्षेत्रको भविष्य क्षेत्रीय देशकै हातमा राख्न तथा बाह्य शक्तिलाई हस्तक्षेप र अवरोध सिर्जना गर्ने अवसर नदिन मद्दत गर्ने बताए।
चिनियाँ कम्युनिस्ट पार्टी केन्द्रीय समितिको राजनीतिक ब्युरोका सदस्यसमेत रहेका वाङले दक्षिण चीन सागरमा पक्षहरूको आचरणसम्बन्धी घोषणालाई आधार बनाएर चीन र आसियान सदस्य राष्ट्रले आचारसंहिता शीघ्र टुङ्ग्याउन निरन्तर प्रयास गरिरहेको उल्लेख गरे।
उनले आसियान बहुध्रुवीय विश्वको महत्वपूर्ण शक्ति तथा ग्लोबल साउथको प्रमुख हिस्सा भएको बताए। चीन–आसियान सम्बन्धको समन्वयकर्ता देशका रूपमा मलेसियाले दुवै पक्षको साझा हित संरक्षण गर्न र पूर्वी एसियाको शान्ति तथा स्थिरता कायम गर्न सक्रिय भूमिका निर्वाह गर्ने विश्वास पनि उनले व्यक्त गरे।
भेटमा मलेसियाली विदेशमन्त्री हसनले मलेसिया–चीन र आसियान–चीन सम्बन्ध इतिहासकै उत्कृष्ट अवस्थामा रहेको बताएका थिए। उनले आसियानको केन्द्रीयता कायम राख्दै चीनसँगको सहकार्य विस्तार गर्न मलेसिया तयार रहेको बताए।
हसनले दक्षिण चीन सागरको विषयसँग प्रत्यक्ष सम्बन्ध नभएका केही बाह्य देशले उक्त क्षेत्रमा शक्ति प्रदर्शन गर्ने गरेको टिप्पणी गर्दै आचारसंहितालाई शीघ्र निष्कर्षमा पुर्याउनुपर्नेमा जोड दिए।
चीन र आसियानले प्रस्तावित आचारसंहितामार्फत दक्षिण चीन सागरमा विवाद व्यवस्थापन, समुद्री गतिविधिका नियम निर्धारण र आकस्मिक तनाव नियन्त्रण गर्ने क्षेत्रीय संयन्त्र निर्माण गर्न खोजिरहेका छन्।
