नेपाल–रुस कूटनीतिक सम्बन्धको ७०औँ वर्षगाँठ काठमाडौंमा मनाइयो
ड्रागन मिडिया समाचार कक्ष
काठमाडौंस्थित रुसी गृहमा नेपाल र रुसबीच कूटनीतिक सम्बन्ध स्थापना भएको ७०औँ वर्षगाँठका अवसरमा विशेष कार्यक्रम आयोजना गरिएको छ।
२० जुलाईमा आयोजित कार्यक्रममा नेपालका परराष्ट्रमन्त्री शिशिर खनाल र रुसी विदेशमन्त्री सर्गेई लाभरोभले आदानप्रदान गरेका शुभकामना सन्देश वाचन गरिएको थियो।
खनालले आफ्नो सन्देशमा रुसी सरकार र जनतालाई शुभकामना व्यक्त गर्दै द्विपक्षीय सम्बन्ध थप सुदृढ र विस्तृत बनाउन रुससँग निकट रूपमा काम गर्ने प्रतिबद्धता जनाएका थिए। उनले भविष्यमा साझेदारीलाई गहिरो र विविध बनाउने सहकार्यका नयाँ क्षेत्र पहिचान गर्नुपर्नेमा जोड दिएका थिए।
लाभरोभले दुई देशका जनताको पारस्परिक हितका लागि दीर्घकालीन साझेदारी सुदृढ बनाउन संयुक्त रूपमा काम गर्ने इच्छा व्यक्त गरेका थिए। नेपाल र तत्कालीन सोभियत संघबीच २० जुलाई १९५६ मा औपचारिक कूटनीतिक सम्बन्ध स्थापना भएको थियो।
कार्यक्रमलाई सम्बोधन गर्दै नेपालका लागि रुसी राजदूत अलेक्सेई सुरोवत्सेभले दुई देशबीचको सहकार्यलाई आधार प्रदान गर्दै आएका रुसी तथा नेपाली सामाजिक संस्थाप्रति आभार व्यक्त गरे।
“हामीप्रति नेपाली जनताको विशेष र न्यानो भावना रहेको अनुभव गरेका छौँ,” उनले भने, “दशकौँको परीक्षाबाट गुज्रिएको यो मित्रता नै हामीले नयाँ र आधुनिक सहकार्यको संरचना निर्माण गर्ने बलियो आधार हो।”
रुसी गृहकी निर्देशक अनास्तासिया खोख्लोभाले सोभियत तथा रुसी विश्वविद्यालयबाट अध्ययन पूरा गरेका हजारौँ नेपाली विद्यार्थीले लामो समयदेखि मस्को र काठमाडौंलाई जोड्ने महत्त्वपूर्ण सेतुको भूमिका निर्वाह गर्दै आएको बताइन्।
कार्यक्रममा नेपाल–रुस विज्ञान समाज, सोभियत तथा रुसी विश्वविद्यालयका पूर्वविद्यार्थीको संस्था मित्रकुञ्ज, फ्रेन्ड्स अफ रुदन सोसाइटी, नेपाल–रुस साहित्य समाज, नेपाल–रुस उद्योग वाणिज्य संघ र शैली थिएटरका प्रतिनिधिले दुई देशबीचको सम्बन्धमा आफ्ना संस्थाले पुर्याउँदै आएको योगदानबारे धारणा राखेका थिए।
सो अवसरमा ‘रुस–नेपाल : मित्रता र सहकार्यका ७० वर्ष’ शीर्षकको ऐतिहासिक फोटो प्रदर्शनी उद्घाटन गरिएको थियो। कार्यक्रममा नेपाल र रुसका समृद्ध कला तथा सांस्कृतिक परम्परा झल्काउने साङ्गीतिक र नृत्य प्रस्तुति पनि समावेश गरिएको थियो।
कार्यक्रमका प्रमुख अतिथि प्रतिनिधिसभा सदस्य तथा नेपाल–रुस संसदीय मैत्री समूहका संयोजक वर्षमान पुन थिए। नेपालले सन् २०२४ को डिसेम्बरमा नेपाल–रुस संसदीय मैत्री समूह गठन गरेको थियो।
द्विपक्षीय सहकार्य प्रवर्द्धनमा पुर्याएको योगदानको कदर गर्दै नेपाल–रुस मैत्री तथा सांस्कृतिक संघका महासचिव स्वराज शाक्यलाई प्रशंसापत्र प्रदान गरिएको थियो।
नेपाल र रुसबीचको सम्बन्ध राजनीतिक तथा कूटनीतिक सम्पर्कसँगै शिक्षा, संस्कृति, विज्ञान, व्यापार र जनस्तरीय सम्बन्धमा आधारित छ। सोभियत संघले नेपालको पूर्वाधार तथा औद्योगिक विकासमा कान्ति बाल अस्पताल, पनौती जलविद्युत केन्द्र, पथलैया–ढल्केबर सडक, जनकपुर चुरोट कारखाना, कृषि औजार कारखाना र वीरगञ्ज चिनी मिलजस्ता परियोजनामार्फत सहयोग गरेको थियो।
