देशलाई संकटबाट मुक्त गर्न राष्ट्रिय एकता आवश्यक : शेखर कोइराला
ड्रागन मिडिया समाचार कक्ष
नेपाली कांग्रेसका नेता डा. शेखर कोइरालाले देशलाई वर्तमान संकटबाट मुक्त गर्न राष्ट्रिय एकता कायम गरेर अघि बढ्नुपर्ने बताएका छन्।
बीपी स्मृति स्वास्थ्य प्रतिष्ठान र बीपी स्मृति सामुदायिक सहकारी अस्पताललगायत संस्थाले बुधबार काठमाडौँमा आयोजना गरेको कार्यक्रममा उनले कांग्रेसको आन्तरिक अवस्थाभन्दा मुलुकको समग्र परिस्थिति बढी चिन्ताजनक बनेको बताए।
कोइरालाले देशको अवस्था अत्यन्त नाजुक र भयावह बनेको उल्लेख गर्दै राजनीतिक दल, परम्परागत शक्ति तथा अन्य राष्ट्रिय शक्तिबीच न्यूनतम समझदारी र सहकार्य आवश्यक रहेको धारणा राखे।
उनले नेपाली कांग्रेसभित्र पनि मेलमिलाप र एकता आवश्यक रहेको बताए। पार्टी एकढिक्का भएर अघि बढ्न नसके कांग्रेसको भविष्यसमेत कठिन बन्न सक्ने उनको भनाइ थियो।
कोइरालाले बीपी कोइराला राष्ट्रिय एकता तथा मेलमिलापको नीति लिएर वि.सं. २०३३ मा स्वदेश फर्किएको समयभन्दा अहिले देशको अवस्था थप जटिल र भयावह बनेको दाबी गरे।
उनले पार्टीगत विवाद र स्वार्थभन्दा माथि उठेर देशको राजनीतिक स्थिरता, राष्ट्रिय स्वाधीनता र लोकतान्त्रिक व्यवस्थाको संरक्षणलाई प्राथमिकता दिनुपर्नेमा जोड दिए।
“अहिले कांग्रेसको चिन्ताभन्दा देशको चिन्ता धेरै ठूलो बनेको छ,” कोइरालाको भनाइको भावार्थ उद्धृत गर्दै आयोजकले जनाएको छ।
उनले राष्ट्रिय संकटको सामना कुनै एक दल वा समूहले मात्र गर्न नसक्ने भन्दै सबै जिम्मेवार राजनीतिक तथा सामाजिक शक्तिबीच संवाद, मेलमिलाप र सहकार्य आवश्यक रहेको बताए।
