नास्पातीका क्रेटभित्र लुकाइएको ६५२ किलो गाँजाजस्तो पदार्थ बरामद
ड्रागन मिडिया समाचार कक्ष
सिरहाको लहान नगरपालिका–३, नयाँ बस्ती टोलबाट प्रहरीले नास्पातीका क्रेटको आडमा लुकाएर राखिएको ६५२ किलो गाँजाजस्तो पदार्थ बरामद गर्दै तीन जनालाई नियन्त्रणमा लिएको छ।
विशेष सूचनाका आधारमा इलाका प्रहरी कार्यालय लहान र लागुऔषध नियन्त्रण ब्युरोको संयुक्त टोलीले पार्किङ गरी राखिएको योद्धा पिकअप गाडीमा खानतलासी गरेको थियो।
प्रहरीका अनुसार गाडीको पछाडिको भागमा राखिएका नास्पातीका ४६ वटा क्रेट हटाएर जाँच गर्दा भित्र बोरामा प्याक गरी लुकाइएको गाँजाजस्तो पदार्थ फेला परेको हो।
बरामद पदार्थको प्याकिङ सामग्री हटाएपछिको खुद तौल ६५२ किलो रहेको जिल्ला प्रहरी कार्यालय सिरहाले जनाएको छ।
घटनामा संलग्न रहेको आरोपमा लहान नगरपालिका–३ की ३८ वर्षीया श्यामकुमारी साह, भारतको बिहार राज्यअन्तर्गत मधुवनी जिल्ला घर भई हाल लहान–३ मा बस्दै आएका ४० वर्षीय गौरव महतो र १९ वर्षीय शिवम साहलाई प्रहरीले नियन्त्रणमा लिएको छ।
जिल्ला प्रहरी कार्यालय सिरहाका प्रवक्ता तथा प्रहरी नायब उपरीक्षक रमेशबहादुर पालका अनुसार बरामद पदार्थ, पिकअप गाडी, नास्पातीका क्रेट र अन्य सामग्री नियन्त्रणमा लिएर अनुसन्धान अघि बढाइएको छ।
पक्राउ परेका तीनै जनामाथि लागुऔषधसम्बन्धी कसुरमा अनुसन्धान भइरहेको छ। प्रहरीले बरामद पदार्थको स्रोत, सम्भावित गन्तव्य, ओसारपसार सञ्जाल र घटनामा संलग्न अन्य व्यक्तिको पहिचान गर्न अनुसन्धान विस्तार गरेको जनाएको छ।
बरामद पदार्थ गाँजा नै भएको अन्तिम पुष्टि प्रयोगशाला परीक्षण र अनुसन्धानपछि हुनेछ।
