चीनले २०३० सम्म नवीकरणीय ऊर्जा क्षमता ३.५ अर्ब किलोवाट पुर्याउने
ड्रागन मिडिया समाचार कक्ष
चीनले सन् २०२६ देखि २०३० सम्मको १५औँ पञ्चवर्षीय योजना अवधिका लागि नवीकरणीय ऊर्जा विकाससम्बन्धी विस्तृत योजना सार्वजनिक गरेको छ।
राष्ट्रिय विकास तथा सुधार आयोग र राष्ट्रिय ऊर्जा प्रशासनले संयुक्त रूपमा जारी गरेको योजनाले चीनको नवीकरणीय ऊर्जा क्षेत्रलाई परिमाण विस्तार, गुणस्तर सुधार र भरपर्दो प्रतिस्थापनको नयाँ चरणमा प्रवेश गराउने लक्ष्य राखेको छ।
योजनाअनुसार सन् २०३० सम्म चीनमा नवीकरणीय ऊर्जा खपत १ अर्ब ८० करोड टन मानक कोइला बराबर पुर्याइनेछ। सन् २०२५ मा यस्तो खपत १ अर्ब १८ करोड टन बराबर रहेको आधारबाट आगामी पाँच वर्षमा उल्लेख्य वृद्धि गर्ने लक्ष्य राखिएको हो।
सन् २०३० सम्म नवीकरणीय स्रोतबाट विद्युत उत्पादन गर्ने कुल जडित क्षमता करिब ३ अर्ब ५० करोड किलोवाट पुर्याइनेछ। ती आयोजनाबाट वार्षिक करिब ६ ट्रिलियन किलोवाट घण्टा विद्युत उत्पादन गर्ने लक्ष्य छ।
हावा र सौर्य ऊर्जाको संयुक्त जडित क्षमता २ अर्ब ८० करोड किलोवाटभन्दा बढी पुर्याइनेछ। यो चीनको कुल विद्युत उत्पादन क्षमताको आधाभन्दा बढी हुनेछ।
हावा र सौर्य ऊर्जाबाट हुने वार्षिक विद्युत उत्पादन ४ ट्रिलियन किलोवाट घण्टाभन्दा माथि पुर्याउने तथा देशको कुल विद्युत उत्पादनमा यी दुई स्रोतको हिस्सा ३० प्रतिशत बनाउने लक्ष्य योजनामा समावेश छ।
नवीकरणीय ऊर्जालाई केवल विद्युत उत्पादनमा सीमित नराखी उद्योग, यातायात, भवन, ताप तथा शीतलन र हरित इन्धन उत्पादनमा समेत विस्तार गर्ने योजना चीनले अघि सारेको छ।
सन् २०३० सम्म नवीकरणीय ऊर्जाको गैरविद्युत उपयोग सन् २०२५ को तुलनामा डेढ गुणाले बढाएर करिब १५ करोड टन मानक कोइला बराबर पुर्याउने लक्ष्य राखिएको छ।
योजनाले उच्च अनुपातमा हावा र सौर्य ऊर्जा जोडिँदा विद्युत प्रणालीमा उत्पन्न हुन सक्ने उतारचढाव व्यवस्थापन गर्न ऊर्जा भण्डारण, बहुऊर्जा समन्वय र नयाँ विद्युत सञ्जाल निर्माणलाई प्राथमिकता दिएको छ।
सन् २०३० सम्म पम्प भण्डारण जलविद्युतको जडित क्षमता करिब १६ करोड किलोवाट पुर्याउने र थप ३० करोड किलोवाटभन्दा बढी भरपर्दो उच्च माग धान्ने नवीकरणीय विद्युत क्षमता विकास गर्ने लक्ष्य राखिएको छ।
चीनले मरुभूमि, गोबी क्षेत्र र बाँझो भूभागमा ठूला हावा तथा सौर्य ऊर्जा केन्द्र निर्माणलाई निरन्तरता दिनेछ। स्थानीय खपतका आयोजना, समुद्री हावा ऊर्जा, ग्रामीण सौर्य प्रणाली र कृषि तथा नवीकरणीय ऊर्जा संयोजन पनि विस्तार गरिनेछ।
योजनामा जैविक ऊर्जा, भूगर्भीय ऊर्जा, सौर्य तापीय विद्युत र समुद्री ऊर्जाको विकाससमेत समेटिएको छ। सन् २०३० सम्म सौर्य तापीय विद्युत क्षमता एक करोड ५० लाख किलोवाट र समुद्री ऊर्जा क्षमता चार लाख किलोवाट पुर्याउने लक्ष्य छ।
नवीकरणीय ऊर्जा भन्नाले प्राकृतिक प्रक्रियाबाट अपेक्षाकृत छोटो समयमा पुनःपूर्ति हुने जलविद्युत, हावा, सौर्य, जैविक, भूगर्भीय र समुद्री ऊर्जालाई जनाइएको छ। योजनाअनुसार चीनमा ‘नयाँ ऊर्जा’ शब्दले जलविद्युतबाहेकका नवीकरणीय ऊर्जा स्रोतलाई समेट्छ।
यो योजनाले चीनको ऊर्जा सुरक्षालाई सुदृढ गर्दै कोइला र अन्य जीवाश्म इन्धनको स्थान क्रमशः स्वच्छ ऊर्जाले लिने आधार तयार गर्ने लक्ष्य राखेको छ। साथै विद्युत सञ्जाल, भण्डारण क्षमता र बजार संयन्त्रलाई नवीकरणीय ऊर्जाको तीव्र विस्तारअनुकूल बनाउने नीति अघि सारिएको छ।
