गोगने खोलामा पहिरो, कर्णाली राजमार्ग पूर्ण रूपमा अवरुद्ध
ड्रागन मिडिया समाचार कक्ष
कालीकोट । अविरल वर्षापछि कालीकोटको गोगने खोलामा लेदोसहितको पहिरो खस्दा कर्णाली राजमार्गअन्तर्गतको सुर्खेत–जुम्ला सडकखण्ड पूर्ण रूपमा अवरुद्ध भएको छ।
जिल्ला प्रहरी कार्यालय कालीकोटका अनुसार प्रतिकूल मौसम र रातिको समयका कारण पहिरो पन्छाउने काम तत्काल शुरु गर्न कठिनाइ भएको छ।
मौसममा सुधार आएपछि आवश्यक उपकरण तथा जनशक्ति परिचालन गरी सडकमा खसेको लेदो र पहिरो हटाउने काम शुरु गरिने प्रहरीले जनाएको छ।
राजमार्ग पूर्ण रूपमा अवरुद्ध भएपछि यस सडकखण्ड हुँदै आवतजावत गर्ने यात्रु तथा सवारीसाधन रोकिएका छन्। प्रहरीले यात्रु र सवारी चालकलाई सडकको पछिल्लो अवस्थाबारे सम्बन्धित निकायसँग जानकारी लिएर मात्र यात्रा गर्न अनुरोध गरेको छ।
वर्षायाममा राजमार्गका विभिन्न स्थानमा पहिरो, ढुङ्गा र लेदो खस्ने जोखिम उच्च रहने भएकाले आवश्यक सतर्कता अपनाउन तथा प्रहरी, स्थानीय प्रशासन र सडक कार्यालयबाट जारी हुने सूचनाको पालना गर्न आग्रह गरिएको छ।
मौसम अनुकूल हुनेबित्तिकै सम्बन्धित निकायसँग समन्वय गरी पहिरो पन्छाउने काम अघि बढाइने जिल्ला प्रहरी कार्यालय कालीकोटले जनाएको छ।
