‘नौल’ आँधी क्वाङतुङमा प्रवेश, सात लाखभन्दा बढीको सुरक्षित स्थानान्तरण

ड्रागन मिडिया समाचार कक्ष

‘नौल’ आँधी चीनको दक्षिणी क्वाङतुङ प्रान्तमा प्रवेश गरेपछि राष्ट्रिय मौसम विज्ञान केन्द्रले आइतबार बिहान आँधीसम्बन्धी सुन्तला चेतावनी जारी गरेको छ।

आँधी आइतबार बिहान हुइदोङ काउन्टीको तटीय क्षेत्रमा प्रवेश गरेको हो। जमिनमा प्रवेश गर्दा यसको केन्द्रनजिक अधिकतम हावाको गति प्रतिसेकेन्ड ४५ मिटर अर्थात करिब १६२ किलोमिटर प्रतिघण्टा पुगेको थियो, जुन चिनियाँ मापन प्रणालीको फोर्स १४ बराबर हो।

‘नौल’ यस वर्ष क्वाङतुङमा प्रवेश गरेको पहिलो तथा चीनको मुख्य भूभागमा प्रवेश गरेका आँधीमध्ये अहिलेसम्मकै शक्तिशाली आँधी भएको चिनियाँ अधिकारीहरूले जनाएका छन्। जमिनमा प्रवेश गरेपछि यसको शक्ति घट्दै गएर आइतबार बिहान गम्भीर आँधीबाट सामान्य आँधीमा परिणत भएको राष्ट्रिय मौसम विज्ञान केन्द्रले जनाएको छ।

चीनले शनिबार राति आँधीका लागि सबैभन्दा उच्च तहको रातो चेतावनी जारी गरेको थियो। आइतबार बिहान त्यसलाई सुन्तला तहमा झारिए पनि भारी वर्षाका लागि रातो र चट्याङ, तीव्र हावा तथा अन्य गम्भीर मौसमी गतिविधिका लागि पहेँलो चेतावनी कायमै राखिएको छ।

आँधीका कारण क्वाङतुङसहित फुजियान, जियाङसी, हुनान र हुबेईका विभिन्न क्षेत्रमा तीव्र हावा तथा भारीदेखि अत्यधिक वर्षा हुने पूर्वानुमान गरिएको छ। जियाङसी, हुनान र क्वाङतुङका ४३ काउन्टीमा आकस्मिक बाढीको जोखिम उच्चतम रातो तहमा पुगेको छ।

अधिकारीहरूले आकस्मिक बाढी, पहिरो, लेदो बग्ने घटना, नदीमा बाढी र शहरी डुबानको जोखिम बढ्न सक्ने भन्दै पूर्वतयारी तथा प्रतिकार्य बलियो बनाउन स्थानीय प्रशासनलाई निर्देशन दिएका छन्। जलस्रोत मन्त्रालयले क्वाङतुङ, जियाङसी र हुनानका लागि बाढी नियन्त्रणसम्बन्धी आपतकालीन प्रतिकार्य तेस्रो तहमा बढाएको छ।

आइतबार मध्यरातसम्म क्वाङतुङमा सात लाख १५ हजार ३५१ जनालाई जोखिमयुक्त क्षेत्रबाट सुरक्षित स्थानमा सारिएको थियो। क्वाङचौ, शनचन, हुइझोउ, शान्तौ र चूहाईसहित १२ शहरमा विद्यालय, कार्यालय, उद्योग, यातायात तथा व्यापारिक गतिविधि पूर्ण वा आंशिक रूपमा स्थगित गरिएको छ।

क्वाङतुङमा आइतबारका लागि तीव्र र सामान्य रेल सेवा बन्द गरिएको छ। क्वाङचौ, शनचन, चूहाई, जियाङ र स्यामनलगायत शहरका विमानस्थलले पनि आँधीको प्रभावअनुसार उडान तालिका समायोजन गरेका छन्।

मौसम अधिकारीहरूले आँधी कमजोर हुँदै गए पनि त्यसले ल्याउने व्यापक वर्षा र सहायक विपदको जोखिम केही दिन कायम रहन सक्ने चेतावनी दिएका छन्। सर्वसाधारणलाई अनावश्यक यात्रा नगर्न तथा आधिकारिक मौसम पूर्वानुमान र स्थानीय प्रशासनको निर्देशन पालना गर्न आग्रह गरिएको छ।