कोदारी राजमार्ग १० दिनदेखि अवरुद्ध, स्थानीय जनजीवन प्रभावित
ड्रागन मिडिया समाचार कक्ष
पहिरोका कारण कोदारी राजमार्ग विगत १० दिनदेखि पूर्ण रूपमा अवरुद्ध भएको छ। लामो समयदेखि यातायात सञ्चालन हुन नसक्दा स्थानीय बासिन्दाको आवतजावतसँगै दैनिक जनजीवन प्रभावित बनेको छ।
अवरुद्ध राजमार्गको वस्तुस्थिति बुझ्न पूर्वाधार विकासमन्त्री सुनिल लम्साल र कानुन, न्याय तथा संसदीय मामिलामन्त्री सोविता गौतमले स्थलगत अनुगमन गरेका छन्।
अनुगमनका क्रममा मन्त्रीद्वयले पहिरोबाट सडकमा पुगेको क्षति, अवरुद्ध खण्डको अवस्था तथा राजमार्ग पुनः सञ्चालनका लागि भइरहेका प्रयासबारे सम्बन्धित अधिकारीसँग जानकारी लिएका थिए।
राजमार्ग अवरुद्ध भएको लामो समय बितिसक्दा पनि सडक खुलाउन प्रभावकारी पहल नभएको भन्दै स्थानीय बासिन्दाले आक्रोश व्यक्त गरेका छन्। यातायात ठप्प हुँदा दैनिक उपभोग्य वस्तुको आपूर्ति, स्थानीय व्यापार, स्वास्थ्य सेवा र अन्य अत्यावश्यक आवतजावतमा कठिनाइ भएको उनीहरूको भनाइ छ।
स्थानीय बासिन्दाले पहिरो हटाउने कामलाई तीव्रता दिई यथाशीघ्र राजमार्ग सञ्चालनमा ल्याउन सरकारसँग माग गरेका छन्।
सरकारी टोलीले सडक खुलाउन आवश्यक जनशक्ति र उपकरण परिचालन गरी काम तीव्र बनाउने तथा अवरुद्ध राजमार्ग छिटो सञ्चालनमा ल्याउन सम्बन्धित निकायसँग समन्वय गर्ने जनाएको छ।
