एल्ब्रुस दुर्घटनाको कारण गलत मौसम पूर्वानुमान भएको जीवित पर्वतारोहीको दाबी
ड्रागन मिडिया समाचार कक्ष
रुसको एल्ब्रुस पर्वतमा भएको दुर्घटनाबाट बाँचेका पर्वतारोही हारिस आदिलोभिचले गलत मौसम पूर्वानुमानका कारण घटना भएको दाबी गरेका छन्।
आदिलोभिचले रुसी समाचार संस्था ‘इजभेस्तिया’सँग कुरा गर्दै आरोहणमा सहभागी सबै पर्वतारोही अनुभवी रहेको र उनीहरू एकअर्कासँग राम्रोसँग परिचित भएको बताए। तयारीको कमीभन्दा पूर्वानुमानविपरीत अचानक बिग्रिएको मौसम दुर्घटनाको मुख्य कारण भएको उनको भनाइ छ।
उनका अनुसार बोस्निया र हर्जगोभिनामा पर्वतहरू नजिकै रहेकाले समूहका सदस्यले प्रायः हरेक सप्ताहन्त पर्वतारोहणको अभ्यास गर्दै आएका थिए। त्यसैले समूहसँग आवश्यक अनुभव र शारीरिक तयारी रहेको उनले बताए।
आरोहण शुरु भएपछि वास्तविक मौसम पूर्वानुमानभन्दा निकै प्रतिकूल बनेको र समूहले कठिन परिस्थितिको सामना गर्नुपरेको आदिलोभिचले बताए। ‘इजभेस्तिया’लाई दिएको विवरणअनुसार पर्वतारोहीहरूले अवस्था थप जोखिमपूर्ण बनेपछि आरोहण रोक्ने निर्णय गरेका थिए।
रुसी अधिकारीहरूलाई उद्धृत गर्दै रोयटर्सले बोस्निया र हर्जगोभिनाका पाँच पर्वतारोही एल्ब्रुसमा आएको शक्तिशाली हिमआँधीमा परेर मृत्यु भएको जनाएको छ। रुसी आपत्कालीन अवस्था मन्त्रालयका उद्धारकर्ताले दुई पर्वतारोहीलाई सुरक्षित उद्धार गरी उपचारका लागि पठाएका थिए।
रुसी अधिकारीहरूका अनुसार तीव्र हावा, हिमपात र कमजोर दृश्यताका कारण उद्धार तथा शव व्यवस्थापन कार्य प्रभावित भएको थियो। यद्यपि गलत मौसम पूर्वानुमान दुर्घटनाको मुख्य कारण भएको आदिलोभिचको भनाइ व्यक्तिगत आकलन हो र घटनाको कारणबारे आधिकारिक अनुसन्धानको अन्तिम निष्कर्ष सार्वजनिक भएको छैन।
