‘जबरजस्ती श्रम’ का नाममा लगाइएको अमेरिकी ट्यारिफप्रति चीनको विरोध

ड्रागन मिडिया समाचार कक्ष

चीनले ‘जबरजस्ती श्रम’ को बहानामा धारा ३०१ अन्तर्गत छानबिन गरी चिनियाँ वस्तुमाथि अतिरिक्त ट्यारिफ लगाउने अमेरिकी निर्णयको कडा विरोध गरेको छ। चीनको वाणिज्य मन्त्रालयले उक्त कदमलाई एकपक्षीयता र संरक्षणवादको नमुना भन्दै सम्बन्धित ट्यारिफ पूर्ण रूपमा हटाउन अमेरिकासँग आग्रह गरेको छ।

ग्लोबल टाइम्सका अनुसार अमेरिकी व्यापार प्रतिनिधिको कार्यालयले ‘जबरजस्ती श्रम’ प्रयोग गरी उत्पादन गरिएका भनिएका आयातित वस्तुबारे गरिएको धारा ३०१ छानबिनपछि चिनियाँ वस्तुमाथि थप १२.५ प्रतिशत ट्यारिफ लगाउने अन्तिम निर्णय सार्वजनिक गरेको थियो। अमेरिकाले अन्य ६० अर्थतन्त्रबाट आयात हुने निश्चित वस्तुमाथि पनि ट्यारिफ लगाएको छ।

चीनको वाणिज्य मन्त्रालयका प्रवक्ताले चीनले सधैँ जबरजस्ती श्रमको विरोध गर्दै आएको तथा यसको रोकथाम र नियन्त्रणका लागि व्यापक श्रम कानुन तथा नियमहरूको व्यवस्था गरेको बताएका छन्।

“चीनले जबरजस्ती श्रम रोक्न र त्यस्ता गतिविधिमाथि कारवाही गर्न निरन्तर काम गरिरहेको छ,” मन्त्रालयको वक्तव्य उद्धृत गर्दै ग्लोबल टाइम्सले जनाएको छ।

मन्त्रालयले अमेरिका स्वयंले सन् १९३० को जबरजस्ती श्रमसम्बन्धी महासन्धि अनुमोदन नगरेको उल्लेख गर्दै वासिङ्टनले लामो समयदेखि यस विषयलाई राजनीतिक र व्यापारिक हतियारका रूपमा प्रयोग गर्दै आएको आरोप लगाएको छ।

प्रवक्ताका अनुसार अमेरिकाले यसपटक पनि ‘जबरजस्ती श्रम’ को बहानामा धारा ३०१ छानबिन शुरु गरी एकपक्षीय ट्यारिफ लगाएको छ। चीनले यसलाई विश्व व्यापारका मान्यताविपरीतको संरक्षणवादी कदमका रूपमा लिएको जनाएको छ।

मन्त्रालयले अमेरिकाले यसअघि अन्तर्राष्ट्रिय आपतकालीन आर्थिक अधिकार ऐनअन्तर्गत लगाइएका ट्यारिफ र धारा १२२ अन्तर्गतको आयात अधिभारलाई धारा ३०१ ट्यारिफबाट प्रतिस्थापन गर्ने संकेत दिएको पनि उल्लेख गरेको छ। चीनका अनुसार तीमध्ये अन्तर्राष्ट्रिय आपतकालीन आर्थिक अधिकार ऐनअन्तर्गत लगाइएको ट्यारिफलाई अमेरिकी अदालतले अवैध ठहर गरिसकेको छ।

चीन–अमेरिका आर्थिक तथा व्यापारिक परामर्शका क्रममा अमेरिकाले चिनियाँ वस्तुमाथि लगाइने प्रतिस्थापन अतिरिक्त ट्यारिफ २० प्रतिशतभन्दा बढी नहुने प्रतिबद्धता जनाएको मन्त्रालयले बताएको छ। हाल अमेरिकाले लगाएको प्रतिस्थापन अतिरिक्त ट्यारिफ १२.५ प्रतिशत रहेको छ।

चीनले अमेरिकाले यसअघि लगाएका कथित फेन्टानिल ट्यारिफ र पारस्परिक ट्यारिफविरुद्ध लागू गरेका आफ्ना प्रतिरोधात्मक उपाय कायम रहेको स्पष्ट पारेको छ। अमेरिकी पक्षका आगामी कदमको नजिकबाट अनुगमन र समग्र मूल्याङ्कन गर्दै आवश्यक सबै उपाय अपनाउने अधिकार सुरक्षित रहेको मन्त्रालयले जनाएको छ।

चीनले अमेरिकालाई गलत अभ्यास सच्याउन र सबै सम्बन्धित एकपक्षीय ट्यारिफ हटाउन आग्रह गरेको छ। पारस्परिक सम्मान, समानता र पारस्परिक हितका आधारमा व्यापारिक तथा आर्थिक संवादलाई निरन्तरता दिन चीन तयार रहेको पनि मन्त्रालयले स्पष्ट पारेको छ।

अमेरिकाले चीनसँग भएका आर्थिक तथा व्यापारिक समझदारी कार्यान्वयन गर्दै समस्याको सूची घटाउने र सहकार्यको क्षेत्र विस्तार गर्ने दिशामा काम गर्नुपर्ने चीनको भनाइ छ। यसले रणनीतिक स्थिरतासहितको रचनात्मक चीन–अमेरिका सम्बन्ध निर्माणमा योगदान पुग्ने मन्त्रालयले जनाएको छ।