अमेरिकामा चरम गर्मी, र्यापिड सिटीमा ४४.४ डिग्रीको कीर्तिमान
ड्रागन मिडिया समाचार कक्ष
अमेरिकाको मध्य तथा दक्षिणी क्षेत्रमा फैलिएको व्यापक गर्मीको लहरबीच साउथ डकोटाको र्यापिड सिटीमा तापक्रमले नयाँ कीर्तिमान बनाएको छ। अमेरिकी राष्ट्रिय मौसम सेवाका अनुसार र्यापिड सिटी क्षेत्रीय विमानस्थलमा गत शनिबार तापक्रम ४४.४ डिग्री सेल्सियस अर्थात ११२ डिग्री फरेनहाइट पुगेको थियो।
सन् १९४२ देखि तापक्रमको अभिलेख राखिँदै आएको उक्त केन्द्रमा यसअघि सन् २००६ जुलाई १५ मा ४३.९ डिग्री सेल्सियस तापक्रम मापन गरिएको थियो। र्यापिड सिटीको मुख्य शहरी क्षेत्रमा पनि तापक्रम ४३.३ डिग्री सेल्सियस पुगेको स्थानीय मौसम अधिकारीले जनाएका छन्।
सिन्ह्वाका अनुसार ठूलो भूभागमा उच्च वायुमण्डलीय चाप कायम रहँदा अमेरिकाका मध्य तथा दक्षिणी राज्यहरूमा चरम गर्मीको चेतावनी जारी गरिएको थियो। तापक्रमसँगै उच्च आर्द्रताका कारण नेब्रास्का, आयोवा, मिसौरी, कन्सास र अर्कान्सासका केही क्षेत्रमा मानिसले अनुभव गर्ने तापक्रम ४३ डिग्री सेल्सियसभन्दा माथि पुगेको थियो।
फिनिक्स, लस भेगास र तल्लो कोलोराडो नदी उपत्यकामा पनि चरम गर्मीको चेतावनी जारी गरिएको थियो। मरुभूमि क्षेत्रमा दिउँसोको तापक्रम ४२ देखि ४६ डिग्री सेल्सियससम्म पुग्ने र कोलोराडो नदी आसपासका केही स्थानमा ४६ डिग्री नाघ्ने पूर्वानुमान गरिएको थियो। रातको तापक्रमसमेत उच्च रहने भएकाले शरीरलाई गर्मीबाट राहत पाउन कठिन हुने मौसमविद्हरूले बताएका छन्।
अर्कान्सासका केही स्थानमा रातको न्यूनतम तापक्रमसमेत २७ डिग्री सेल्सियस आसपास रहने अनुमान गरिएको थियो। लगातार उच्च तापक्रम र आर्द्रताले विशेषगरी वातानुकूलित सुविधा नभएका परिवार, बाहिर काम गर्ने श्रमिक तथा स्वास्थ्य समस्या भएका मानिसमाथि जोखिम बढाएको छ।
अमेरिकी रोग नियन्त्रण तथा रोकथाम केन्द्रले चरम गर्मीका कारण शरीरमा पानीको कमी, गर्मीजन्य थकान, बेहोसी र तापघातजस्ता गम्भीर स्वास्थ्य समस्या हुन सक्ने चेतावनी दिएको छ। ज्येष्ठ नागरिक, बालबालिका, गर्भवती, बाहिर काम गर्ने श्रमिक र दीर्घरोग भएका व्यक्ति बढी जोखिममा रहने केन्द्रले जनाएको छ।
ह्युस्टनका नगरप्रमुख जोन ह्विटमायरले पुस्तकालय, सामुदायिक केन्द्र र अन्य सार्वजनिक भवनमा करिब ११२ वटा शीतल केन्द्र सञ्चालन गरिएको बताएका छन्। स्थानीय प्रशासनले फ्रिजमा राख्नुपर्ने औषधि प्रयोग गर्ने तथा विद्युतमा निर्भर स्वास्थ्य उपकरण चलाउने नागरिकलाई वैकल्पिक व्यवस्था तयार राख्न आग्रह गरेको छ।
चरम गर्मीले कृषि क्षेत्रमा पनि चिन्ता बढाएको छ। सिन्ह्वाले अमेरिकी कृषि विभागको प्रतिवेदन उद्धृत गर्दै मिनेसोटा, आयोवा, नेब्रास्का, डकोटा क्षेत्र र मोन्टानामा चरन तथा घाँसे मैदानको अवस्था बिग्रिएको जनाएको छ। सामान्यभन्दा बढी तापक्रम, वर्षाको कमी र विद्यमान सुक्खापनले ग्रेट प्लेन्स तथा प्रमुख कृषि क्षेत्र ‘कर्न बेल्ट’ मा तीव्र गतिमा खडेरी विकास हुने जोखिम बढाएको छ।
मौसम सेवाका अनुसार उत्तरी मैदानी क्षेत्र र अपर मिडवेस्टबाट चिसो वायुप्रणाली प्रवेश गरेपछि मध्य अमेरिकाका केही स्थानमा गर्मी केही कम हुन सक्छ। तर उच्च चापको प्रणाली पश्चिमतर्फ सर्ने भएकाले क्यालिफोर्निया, दक्षिणपश्चिमी क्षेत्र र ग्रेट बेसिनमा पुनः चरम गर्मीको जोखिम बढ्ने अनुमान छ।
अमेरिकी जलवायु पूर्वानुमान केन्द्रले अगस्टको शुरुमा ग्रेट बेसिनका केही भागमा चरम गर्मीको उच्च जोखिम रहने जनाएको छ। क्यालिफोर्निया, दक्षिणपश्चिमी राज्य, रकी पर्वतीय क्षेत्र र दक्षिणी मैदानी क्षेत्रमा पनि सामान्यभन्दा उच्च तापक्रमको जोखिम देखिएको छ।
उच्च तापक्रम र सुक्खापनले पश्चिमी अमेरिकाका केही क्षेत्रमा डढेलोको जोखिम बढाउन सक्ने चेतावनी दिइएको छ। उच्च चापीय प्रणालीको बाहिरी क्षेत्रमा भने शक्तिशाली मेघगर्जन, भारी वर्षा र आकस्मिक बाढीको सम्भावना रहेको मौसमविद्हरूले बताएका छन्।
