टाइप–०७१ र टाइप–०७५ जहाजसँग जेड–२०जे हेलिकप्टरको संयुक्त अवतरण अभ्यास
ड्रागन मिडिया समाचार कक्ष
चीनको जनमुक्ति सेनाको नौसेनाले टाइप–०७१ उभयचर डक अवतरण जहाज र टाइप–०७५ उभयचर आक्रमण जहाजसँग नयाँ पुस्ताको जेड–२०जे हेलिकप्टर परिचालन गरी संयुक्त अवतरण अभ्यास गरेको छ।
चाइना मिलिटरी अनलाइनले सार्वजनिक गरेका तस्बिरअनुसार जनमुक्ति सेनाको दक्षिणी युद्धक्षेत्र कमान्डअन्तर्गतको नौसैनिक समूहमा आबद्ध छाङपाइशान जहाजले जेड–२०जे जहाजवाहक हेलिकप्टर र एयर-कुशन अवतरण यानसँग समन्वय गर्दै बहुविषयक सामुन्द्रिक प्रशिक्षण सञ्चालन गरेको हो।
हल नम्बर ९८९ रहेको टाइप–०७१ वर्गको छाङपाइशान उभयचर डक अवतरण जहाजले जुलाईको मध्यदेखि उत्तरार्धसम्म उक्त प्रशिक्षण गरेको चाइना मिलिटरी अनलाइनले जनाएको छ। अभ्यासमा हेलिकप्टर र अवतरण यानलाई एकीकृत रूपमा परिचालन गरिएको थियो।
यसअघि चाइना सेन्ट्रल टेलिभिजनले टाइप–०७५ वर्गका हाइनान र हुपेई उभयचर आक्रमण जहाजका डेकमा जेड–२०जे हेलिकप्टर परिचालन गरिएका दृश्य सार्वजनिक गरेको थियो। हुपेईमा तैनाथ जेड–२०जेले दक्षिण चीन सागरको प्रशिक्षण क्षेत्रमा आयोजित युद्धाभिमुख अभ्यासमा पनि भाग लिएको सीसीटीभीले जनाएको छ।
सीसीटीभीका अनुसार टाइप–०७५ जहाजबाट जेड–२०जे हेलिकप्टरको उडान र अवतरण सफलतापूर्वक सञ्चालन हुनुले नयाँ पुस्ताको यो बहुउद्देश्यीय हेलिकप्टरलाई चिनियाँ नौसेनाको उभयचर अभियानको प्रमुख संरचनामा समावेश गर्ने प्रक्रिया अघि बढेको देखाएको छ।
जेड–२०जे हेलिकप्टर पहिलोपटक नोभेम्बर २०२४ मा दक्षिण चीनको क्वाङतोङ प्रान्तस्थित चुहाईमा आयोजित एयरशो चाइना–२०२४ मा सार्वजनिक गरिएको थियो।
चिनियाँ सैन्य मामिला विशेषज्ञ सोङ चोङपिङले ग्लोबल टाइम्ससँग विभिन्न प्रकारका युद्धपोतमा जेड–२०जेको बढ्दो उपस्थितिले यसको उत्पादन, सेवा प्रवेश र परिचालन क्षमता क्रमिक रूपमा विस्तार भइरहेको संकेत गरेको बताएका छन्।
उनका अनुसार यसअघिको जेड–८सी हेलिकप्टरको तुलनामा जेड–२०जेले उभयचर अवतरण अभियानमा बढी भार बोक्ने, विभिन्न जिम्मेवारी पूरा गर्ने र मर्मत तथा प्राविधिक सहयोग प्रणालीलाई थप सरल तथा मानकीकृत बनाउने लाभ दिन्छ।
एउटै आधारभूत जेड–२० संरचनामा विकसित विभिन्न संस्करणले निगरानी, पनडुब्बीविरोधी अभियान, सैनिक ओसारपसार, ठाडो अवतरण तथा खोज र उद्धारजस्ता जिम्मेवारी पूरा गर्न सक्ने विशेषज्ञको भनाइ छ। यसले एउटै जहाजमा फरक–फरक प्रकारका हेलिकप्टरका लागि पृथक प्राविधिक प्रणाली राख्नुपर्ने आवश्यकता घटाउन सहयोग गर्नेछ।
जेड–२० चीनले स्वतन्त्र रूपमा विकास गरेको करिब १० टन वर्गको मध्यम आकारको बहुउद्देश्यीय हेलिकप्टर हो। यसको जेड–२०जे संस्करण मुख्यतः सामुन्द्रिक क्षेत्रमा सैनिक ओसारपसार र ठाडो आक्रमण तथा अवतरण अभियानका लागि विकास गरिएको सीसीटीभीले जनाएको छ।
सीसीटीभीका अनुसार जेड–२०जे टाइप–०७५ उभयचर आक्रमण जहाज र टाइप–०७१ उभयचर डक अवतरण जहाजका अतिरिक्त टाइप–०५५ तथा टाइप–०५२डी विध्वंसक र टाइप–०५४ए फ्रिगेटबाट पनि सञ्चालन गर्न सकिन्छ।
विश्लेषकहरूका अनुसार जेड–२०जे, एयर-कुशन अवतरण यान तथा ठूला उभयचर जहाजको संयुक्त परिचालनले सैनिक तथा सामग्री स्थानान्तरण, सामुन्द्रिक खोज तथा उद्धार र आपत्कालीन प्रतिक्रिया अभियानमा चिनियाँ नौसेनाको एकीकृत परिचालन क्षमता थप सुदृढ बनाउनेछ।
