चिनियाँ जनमुक्ति सेनाको ९९ औँ स्थापना दिवस : प्रविधि, युद्धतत्परता र आधुनिकीकरणमा तीव्र फड्को

ड्रागन मिडिया समाचार कक्ष

चीनले चिनियाँ जनमुक्ति सेना (पीएलए) को ९९ औँ स्थापना दिवस मनाइरहँदा राष्ट्रिय प्रतिरक्षा आधुनिकीकरण, बौद्धिक युद्धप्रणाली, अत्याधुनिक सैन्य उपकरण र सबै क्षेत्र समेट्ने संयुक्त युद्धक्षमतामा हासिल गरेको प्रगतिलाई प्रमुख उपलब्धिका रूपमा प्रस्तुत गरेको छ।

सन् २०२६ को चिनियाँ सेना दिवसका अवसरमा सार्वजनिक गरिएको ‘चिशेङ’ अर्थात् ‘विजय’ नामक प्रचारात्मक वृत्तचित्रमा काँधबाट प्रहार गरिने रकेट लन्चर बोकेका रोबोटिक ब्वाँसाहरू समुद्री किनारको अवरोध पार गर्दै आक्रमणमा अघि बढेको दृश्य समावेश गरिएको छ। वृत्तचित्रमा टाइप–१९१ लामो दूरीको रकेट प्रणालीबाट सामरिक क्षेप्यास्त्र प्रक्षेपण, टाइप–०७६ जल–थल आक्रमण जहाजबाट प्रलोभनयुक्त तापीय फ्लेयर प्रहार र केभीडी–००२ टोही तथा आक्रमण क्षमतायुक्त मानवरहित विमानको प्रत्यक्ष प्रहारसमेत देखाइएको छ।

अगस्ट १, २०२६ मा पीएलए स्थापनाको ९९ वर्ष पूरा भएको छ। सन् २०२७ मा हासिल गर्नुपर्ने सेनाको शतवार्षिकी लक्ष्य नजिकिँदै गर्दा यस वर्षको सेना दिवसलाई विशेष महत्वका साथ हेरिएको छ।

सिन्ह्वा समाचार संस्थाका अनुसार चिनियाँ कम्युनिष्ट पार्टी केन्द्रीय समितिको राजनीतिक ब्युरोको सामूहिक अध्ययन सत्रको अध्यक्षता गर्दै राष्ट्रपति सी जिनपिङले राजनीतिक मार्गदर्शन सुदृढ गर्न तथा नवप्रवर्तनमा आधारित विकासलाई तीव्र पार्न निर्देशन दिएका छन्।

उहाँले सन् २०२७ सम्म पीएलएको शतवार्षिकी लक्ष्य पूरा गर्दै राष्ट्रिय प्रतिरक्षा र सशस्त्र सेनाको आधुनिकीकरणमा निर्णायक प्रगति हासिल गर्नुपर्ने बताउनुभएको छ। चिनियाँ आधुनिकीकरणमार्फत शक्तिशाली राष्ट्र निर्माण र राष्ट्रिय पुनरुत्थान अघि बढाउन आधुनिक सेनाले रणनीतिक सहयोग प्रदान गर्ने उहाँको भनाइ छ।

चिनियाँ सैन्य विज्ञहरूका अनुसार पछिल्लो एक वर्षमा पीएलएले नयाँ पुस्ताका उपकरण विकास, सबै युद्धक्षेत्र समेट्ने अभ्यास, संयुक्त सैन्य सञ्चालन र संरचनागत सुधारलाई प्राथमिकता दिएको छ। युक्रेन सङ्कट, पश्चिम एसियाको तनाव र चीन वरपरको जटिल सुरक्षा वातावरणका बीच युद्धतत्परतालाई सेनाको मुख्य जिम्मेवारीका रूपमा अघि बढाइएको छ।

सेप्टेम्बर ३, २०२५ मा आयोजित विजय दिवस सैन्य परेडमा टाइप–१०० मुख्य युद्ध ट्याङ्क र टाइप–१०० सहायक युद्धवाहन सार्वजनिक गरिएको थियो। ती उपकरणले चिनियाँ स्थल सेना सूचना, अग्निशक्ति र बौद्धिक प्रविधि एकीकृत गरिएको युद्धयुगमा प्रवेश गरेको सङ्केत गरेको ग्लोबल टाइम्सले जनाएको छ।

परेडमा चार प्रकारका वाईजे श्रृंखलाका सुपरसोनिक तथा हाइपरसोनिक जहाजविरोधी क्षेप्यास्त्र, उच्च ऊर्जायुक्त लेजर हतियार र उच्च शक्तियुक्त माइक्रोवेभ प्रणालीसमेत प्रदर्शन गरिएको थियो। साना, सुस्त र कम उचाइमा उड्ने ड्रोनजस्ता उदीयमान खतराको सामना गर्न ती प्रणाली विकास गरिएको बताइएको छ।

चीनले स्थल, समुन्द्र र हवाई माध्यमबाट आणविक प्रत्याक्रमण गर्न सक्ने त्रिआयामिक आणविक क्षमता तथा विश्वव्यापी प्रहार दायरा भएको डीएफ–५सी अन्तरमहादेशीय क्षेप्यास्त्र पनि औपचारिक रूपमा प्रदर्शन गरेको थियो।

नोभेम्बर २०२५ मा चीनको तेस्रो विमानवाहक जहाज ‘फुच्येन’ सेवामा प्रवेश गरेको थियो। विद्युतीय चुम्बकीय क्याटापल्ट प्रणाली जडान गरिएको फुच्येनले जे–३५ स्टेल्थ लडाकु विमान र केजे–६०० विमानवाहक प्रारम्भिक चेतावनी विमान सञ्चालन गर्न सक्छ।

सैन्य विज्ञ चाङ चुनशले चीनको सैन्य उपकरण विकास अनुकरणबाट समानान्तर प्रतिस्पर्धा हुँदै केही क्षेत्रमा नेतृत्व गर्ने अवस्थामा पुगेको बताएका छन्। उनका अनुसार स्वतन्त्र प्राविधिक नवप्रवर्तन र प्रणालीगत युद्धक्षमता अब चिनियाँ प्रतिरक्षा विकासको मुख्य विशेषता बनेका छन्।

टाइप–०७६ जल–थल आक्रमण जहाज ‘सिचुवान’ले विभिन्न चरणका समुद्री परीक्षण पूरा गरिसकेको छ। विद्युतीय चुम्बकीय क्याटापल्ट र दुईवटा द्वीप आकारको नियन्त्रण संरचना रहेको यो जहाज औपचारिक रूपमा सेवामा प्रवेश गरेपछि विमानवाहक समूहसँग मिलेर टाढाको समुन्द्र तथा टापु क्षेत्रमा सञ्चालन गर्न सक्ने अपेक्षा गरिएको छ।

पीएलएले पछिल्लो वर्ष ताइवान जलडमरू, दक्षिण चीन समुन्द्र र पश्चिमी प्रशान्त क्षेत्रमा युद्धकेन्द्रित अभ्यास तीव्र बनाएको छ। यस क्रममा ‘जस्टिस मिसन–२०२५’ संयुक्त अभ्यास, लियाओनिङ विमानवाहक समूहको टाढाको समुन्द्रमा प्रशिक्षण, पनडुब्बीबाट रणनीतिक क्षेप्यास्त्र परीक्षण तथा चीन–रुस संयुक्त हवाई र नौसैनिक अभ्यास सञ्चालन गरिएका छन्।

चीनको राज्यपरिषद सूचना कार्यालयले सार्वजनिक गरेको ‘नयाँ युगमा चीनको राष्ट्रिय प्रतिरक्षा’ श्वेतपत्रले चीनको प्रतिरक्षा नीति मूलतः रक्षात्मक रहेको स्पष्ट गरेको छ। शान्तिपूर्ण विकास, स्वतन्त्र परराष्ट्र नीति र शान्ति तथा सद्भावमा आधारित सांस्कृतिक परम्पराले चीनलाई रक्षात्मक सुरक्षा मार्गमा अघि बढाएको श्वेतपत्रमा उल्लेख छ।

सैन्य आधुनिकीकरणसँगै पीएलएका सैनिकहरू विपद राहत, संयुक्त राष्ट्रसङ्घीय शान्ति स्थापना तथा अन्तर्राष्ट्रिय मानवीय सहायतामा पनि परिचालित हुँदै आएका छन्। चिनियाँ विज्ञहरूका अनुसार सन् २०२७ को शतवार्षिकी लक्ष्य अन्तिम गन्तव्य नभई सन् २०३५ सम्म प्रतिरक्षा आधुनिकीकरण पूरा गर्ने र यस शताब्दीको मध्यसम्म विश्वस्तरीय सेना निर्माण गर्ने दीर्घकालीन रणनीतिक यात्राको महत्वपूर्ण चरण हो।