राम्रो समीक्षा हुँदाहुँदै ‘थ्री किङ्डम्स: द बिगिनिङ’ किन हलबाट पछि हट्यो?

ड्रागन मिडिया समाचार कक्ष

चीनको ऐतिहासिक एनिमेसन चलचित्र ‘थ्री किङ्डम्स: द बिगिनिङ’ ले सकारात्मक दर्शक प्रतिक्रिया र राम्रो मूल्याङ्कन पाए पनि तीव्र ग्रीष्मकालीन प्रतिस्पर्धाका कारण आफ्नो पहिलो प्रदर्शन अस्थायी रूपमा अन्त्य गरेको छ। निर्माण पक्षले उपयुक्त समयमा चलचित्रलाई पुनः प्रदर्शन गर्ने घोषणा गरेको छ।

ग्लोबल टाइम्सका अनुसार जुलाई १० मा प्रदर्शनमा आएको चलचित्रले हलबाट पछि हट्ने निर्णय हुँदासम्म ८ करोड २७ लाख युआन आम्दानी गरेको थियो। चिनियाँ चलचित्र समीक्षा मञ्च डौबानमा चलचित्रले १० मध्ये ८.१ अङ्क प्राप्त गरेको छ। राम्रो प्रतिक्रिया हुँदाहुँदै चलचित्रले अपेक्षित सङ्ख्यामा पर्दा र दर्शक पाउन नसकेको निर्माण पक्षले जनाएको छ।

निर्माण टोलीले तीन वर्षसम्म काम गरेर तयार पारेको चलचित्रमा करिब एक हजार जनाको सहभागिता थियो। चलचित्रका निर्माताले तीन वर्षको मेहनतको सम्मान गर्दै चलचित्र हेर्न चाहने दर्शकलाई उपयुक्त अवसर दिन पहिलो प्रदर्शन अन्त्य गरिएको बताएका छन्। निर्माण पक्षले अहिलेको बजार अवस्थामा चलचित्र हेर्न इच्छुक दर्शक सहज रूपमा हलसम्म पुग्ने पर्याप्त वातावरण नरहेको उल्लेख गरेको छ।

चलचित्रले दर्शक आकर्षित गर्न असामान्य प्रचार अभियानसमेत सञ्चालन गरेको थियो। जुलाई १७ पछि टिकट खरिद गरेका दर्शकलाई चलचित्र मन नपरे प्रमाण पेश गरेर टिकटको रकम फिर्ता लिन सक्ने व्यवस्था गरिएको थियो। ‘मन नपरे पैसा फिर्ता’ अभियानले निर्माण पक्षको आत्मविश्वास देखाए पनि घट्दो पर्दा हिस्सा र व्यावसायिक दबाबलाई परिवर्तन गर्न सकेन।

बेइजिङस्थित लाइट चेजर एनिमेसनले निर्माण गरेको चलचित्रले पूर्वी हान राजवंशको अन्तिम चरणमा छाओ छाओ र युआन शाओको प्रारम्भिक जीवनलाई प्रस्तुत गरेको छ। पछि चिनियाँ इतिहासका प्रभावशाली पात्र बनेका उनीहरूको राजनीतिक महत्वाकाङ्क्षा, व्यक्तिगत छनोट र बढ्दो प्रतिद्वन्द्वितालाई चलचित्रको मुख्य आधार बनाइएको छ।

सिन्ह्वाका अनुसार निर्देशक सिए जुनवेई नेतृत्वको टोलीले ऐतिहासिक वातावरणलाई विश्वसनीय बनाउन हनान प्रान्तको लुओयाङस्थित पूर्वी हान शाही दरबारका भग्नावशेषलगायत पुरातात्त्विक स्थलमा अनुसन्धान गरेको थियो। चलचित्रमा छाओ छाओको कवच र सामग्री उनको समाधिबाट प्राप्त पुरातात्त्विक वस्तुका आधारमा तयार गरिएको छ। नृत्यका दृश्यमा हनान संग्रहालयमा सुरक्षित ढुङ्गे कलाकृतिबाट प्रेरणा लिइएको छ।

तर चलचित्र प्रदर्शनमा आएको समय चीनको वर्षकै सबैभन्दा प्रतिस्पर्धात्मक अवधिमध्ये एक थियो। यस वर्षको ग्रीष्मकालीन सिजनमा एक सय २० भन्दा बढी स्वदेशी तथा विदेशी चलचित्र प्रदर्शनमा आउने तयारीमा छन्। ठूला व्यावसायिक चलचित्रले अधिकांश पर्दा र दर्शकको ध्यान प्राप्त गर्दा गम्भीर ऐतिहासिक विषयमा आधारित मध्यम बजेटको एनिमेसनलाई आफ्नो दर्शक आधार निर्माण गर्न कठिन भएको छ।

लाइट चेजर एनिमेसनका अध्यक्ष यु चौले चलचित्रको अन्तर्राष्ट्रिय वितरण प्रक्रिया अघि बढिरहेको र यसलाई विदेशी दर्शकमाझ पुर्‍याउने तयारी भइरहेको बताउनुभएको छ। स्टुडियोका निर्माण पछिल्लो दशकमा दर्जनौँ देश तथा क्षेत्रमा प्रदर्शन भइसकेका छन्। ‘थ्री किङ्डम्स: द बिगिनिङ’ तीन चलचित्रको योजनाबद्ध श्रृंखलाको पहिलो भाग हो भने दोस्रो भाग सन् २०२८ को ग्रीष्मकालमा प्रदर्शन गर्ने लक्ष्य राखिएको छ।

चलचित्रको अस्थायी फिर्तीले यसको विषयवस्तु वा निर्माण गुणस्तर कमजोर भएको मात्र संकेत गर्दैन। यसले चीनको विशाल तर अत्यन्त प्रतिस्पर्धात्मक चलचित्र बजारमा राम्रो समीक्षा, सांस्कृतिक गहिराइ र ठूलो प्राविधिक मेहनतलाई व्यावसायिक सफलतामा बदल्न सही प्रदर्शन मिति, पर्याप्त पर्दा र प्रभावकारी प्रचार रणनीति अनिवार्य रहेको देखाएको छ।