इरानविरुद्ध सैन्य सहयोग ‘आक्रामक कार्य’ मानिने अराघचीको चेतावनी
ड्रागन मिडिया समाचार कक्ष
इरानी विदेशमन्त्री सेयद अब्बास अराघचीले इरानमाथि आक्रमण गर्न अमेरिकालाई बेलायती भूभाग, सैन्य अखडा वा अन्य सुविधा प्रयोग गर्न दिइए त्यसलाई अन्तर्राष्ट्रिय कानुनअनुसार आक्रामक कार्य मानिने चेतावनी दिनुभएको छ।
इरानी विदेश मन्त्रालयले शनिबार जारी गरेको विवरणअनुसार अराघचीले शुक्रबार बेलायती विदेशमन्त्री एड मिलिब्यान्डसँग टेलिफोन वार्ता गर्दै विद्यमान प्रतिरक्षा सम्झौताको नाममा समेत इरानविरुद्धका आक्रमणकारीलाई गरिने कुनै पनि सहयोग अस्वीकार्य हुने बताउनुभएको हो।
अराघचीले इरानप्रति बेलायती सरकारको नीति आधारहीन र अनुचित रहेको आरोप लगाउनुभएको छ। उहाँले इस्लामिक क्रान्तिकारी गार्ड कोरलाई बेलायतको राष्ट्रिय सुरक्षाका लागि चुनौतीका रूपमा प्रस्तुत गरिएको तथा अमेरिका र इजरायलले इरानविरुद्ध सञ्चालन गरेका पछिल्ला सैन्य गतिविधिमा लन्डनको भूमिका रहेको आरोप लगाउँदै नीति पुनर्विचार गर्न आग्रह गर्नुभएको छ।
उहाँका अनुसार कुनै देशले आफ्नो भूभाग वा सुविधा अर्को सार्वभौम राष्ट्रमाथि अवैध आक्रमण गर्न प्रयोग गर्न दिनु अन्तर्राष्ट्रिय कानुनअन्तर्गत आक्रामक कार्य मानिन्छ। यस्तो अवस्थामा आक्रमणमा परेको राष्ट्रले आत्मरक्षाको अधिकार प्रयोग गर्न सक्ने उहाँको भनाइ छ।
अराघचीले इरान अमेरिकासँगको कूटनीतिक प्रक्रियामा सद्भावका साथ सहभागी भएको र द्वन्द्व अन्त्य गर्ने उद्देश्यले जुनमा समझदारीपत्रमा हस्ताक्षर गरेको बताउनुभएको छ। तर वाशिङ्टनले आफ्ना प्रतिबद्धता पूरा नगरेको उहाँको आरोप छ।
उहाँले होर्मुज जलडमरूमा पानीजहाजको आवागमन व्यवस्थापन गर्न इरानले ओमानसँग कार्यगत संयन्त्र निर्माण गर्ने प्रयास गरिरहेको जानकारी दिनुभएको छ। बाह्य पक्षको हस्तक्षेपले जलमार्गसम्बन्धी अवस्था थप जटिल बनाउने उहाँले चेतावनी दिनुभएको छ।
इरानी विदेश मन्त्रालयका अनुसार बेलायती विदेशमन्त्री मिलिब्यान्डले बेलायत इरानविरुद्धको युद्धमा सहभागी नरहेको बताउँदै विवाद समाधानका लागि कूटनीति नै उपयुक्त मार्ग भएको धारणा राख्नुभएको छ।
पश्चिम एसियामा अमेरिका–इरान तनाव बढिरहेका बेला भएको वार्ताले बेलायती सैन्य सुविधा प्रयोगसम्बन्धी विषयलाई पुनः कूटनीतिक विवादको केन्द्रमा ल्याएको छ।
