ह्वाङयान ताओ नजिक चिनियाँ तटरक्षकको अधिकार संरक्षण तथा कानुन कार्यान्वयन अभ्यास
ड्रागन मिडिया समाचार कक्ष
चिनियाँ तटरक्षक बलले ह्वाङयान ताओ नजिकका समुन्द्री क्षेत्रमा अधिकार संरक्षण, कानुन कार्यान्वयन, व्यवस्थापन तथा नियन्त्रणसम्बन्धी अभ्यास सञ्चालन गरेको छ।
चिनियाँ तटरक्षक बलका प्रवक्ता चियाङ ल्युका अनुसार अभ्यासमा जहाज नजिक पुग्ने, जहाजमा प्रवेश गरी निरीक्षण गर्ने, खोजतलास तथा नियन्त्रणमा लिने, जबर्जस्ती प्रवेश रोक्ने र उल्लङ्घनकारी जहाजलाई तानेर हटाउनेलगायतका कारवाही समावेश थिए।
ग्लोबल टाइम्सले प्राप्त गरेको दृश्य सामग्रीमा चिनियाँ तटरक्षक बलले साना डुङ्गा परिचालन, समुन्द्रमा लक्ष्यको पछ्याइ, जहाजमा प्रवेश तथा निरीक्षण र नियन्त्रणसम्बन्धी अभ्यास गरेको देखाइएको छ।
अभ्यासलाई वास्तविक कानुन कार्यान्वयनको परिस्थितिअनुसार सञ्चालन गरिएको चिनियाँ विवरणमा उल्लेख छ। जहाज निरीक्षण तथा नियन्त्रण अभ्यासका क्रममा कानुन कार्यान्वयनसम्बन्धी उपकरण बोकेका तटरक्षक अधिकारीहरू विदेशी जहाजको भूमिकामा प्रयोग गरिएको चिनियाँ माछा मार्ने जहाजमा प्रवेश गरेका थिए।
जबरजस्ती तानेर हटाउने अभ्यासमा तटरक्षकका दुईवटा कानुन कार्यान्वयन जहाजले दुवैतर्फबाट नियन्त्रण कायम गरी उच्च गतियुक्त डुङ्गालाई अभ्यास क्षेत्रबाट हटाएका थिए।
चिनियाँ सामाजिक विज्ञान प्रतिष्ठानअन्तर्गत शान्ति तथा विकास अध्ययन संस्थानका अनुसन्धानकर्ता याङ स्याओले सार्वजनिक गरिएको अभ्यास ह्वाङयान ताओ वरपर चीनको भूक्षेत्रीय सार्वभौमिकता उल्लङ्घन गर्न सक्ने सम्भावित गतिविधिप्रति लक्षित रहेको बताउनुभएको छ।
उहाँका अनुसार अभ्यासले विदेशी जहाजको अनधिकृत प्रवेश पहिचान गर्ने, जहाजमा चढेर निरीक्षण गर्ने, सम्बन्धित व्यक्तिलाई नियन्त्रणमा लिने, जबर्जस्ती प्रवेश रोक्ने र आवश्यक अवस्थामा उल्लङ्घनकारी जहाजलाई नियन्त्रण क्षेत्रबाट तानेर हटाउने सम्पूर्ण प्रक्रिया समेटेको छ।
याङले ह्वाङयान ताओ वरपरको चीनको भूक्षेत्रीय समुन्द्रमा प्रवेश गर्न खोज्ने विदेशी जहाजमाथि कानुनअनुसार निरीक्षण तथा नियन्त्रण गरिने बताउनुभएको छ। नियन्त्रण आदेश अवज्ञा गर्दै प्रवेशको प्रयास जारी राखिए तटरक्षक बलले चरणबद्ध कानुन कार्यान्वयनका उपाय अवलम्बन गर्न सक्ने उहाँको भनाइ छ।
चिनियाँ तटरक्षकसम्बन्धी कानुनको धारा १७ अनुसार चीनको भूक्षेत्रीय समुन्द्र वा आन्तरिक जलक्षेत्रमा अवैध रूपमा प्रवेश गर्ने विदेशी जहाजलाई तत्काल बाहिर जान आदेश दिन सकिन्छ। आदेश अवज्ञा गरिए त्यस्ता जहाजलाई नियन्त्रणमा लिने, बलपूर्वक हटाउने वा तानेर बाहिर लैजानेलगायतका उपाय अपनाउन सकिने कानुनी व्यवस्था छ।
त्यसैगरी धारा ४६ ले चीनको अधिकार क्षेत्रभित्र अवैध उत्पादन वा अन्य गतिविधि गर्ने विदेशी जहाजले रोक्न दिएको आदेश नमानेमा वा निरीक्षण अस्वीकार गरेमा कानुन कार्यान्वयनका थप उपाय अपनाउन सकिने व्यवस्था गरेको छ।
याङले ह्वाङयान ताओ नजिक गरिएको अभ्यासलाई चीनको कानुनी अधिकार र कार्यान्वयन क्षमताको स्पष्ट प्रदर्शनका रूपमा व्याख्या गर्नुभएको छ। उहाँका अनुसार अभ्यासले चीनको तटरक्षक कारवाही कानुनी आधारमा मात्र नभई आवश्यक अवस्थामा कानुनअनुसार कडाइका साथ कार्यान्वयन गरिने सन्देश दिएको छ।
उहाँले चीनको सार्वभौमिकता र समुन्द्री अधिकार उल्लङ्घन गर्न खोज्ने देशहरूले आफ्ना गतिविधिको सम्भावित परिणाम गम्भीर रूपमा विचार गर्नुपर्ने बताउनुभएको छ।
याङका अनुसार अभ्यासमा प्रयोग गरिएका काल्पनिक विपक्षी जहाजलाई हाल ह्वाङयान ताओ वरपर गतिविधि गरिरहेका विदेशी जहाजभन्दा बढी गतिशील र चुनौतीपूर्ण बनाइएको थियो। यसबाट तटरक्षक बलले अझ जटिल परिस्थितिको सामना गर्ने क्षमता परीक्षण गरेको उहाँको भनाइ छ।
चिनियाँ तटरक्षक बलले ह्वाङयान ताओ चीनको अभिन्न भूभाग भएको पुनः स्पष्ट गरेको छ। बलले ह्वाङयान ताओ नजिकका समुन्द्री क्षेत्रमा अधिकार संरक्षण, कानुन कार्यान्वयन, गस्ती, व्यवस्थापन र नियन्त्रण थप सुदृढ गर्ने जनाएको छ।
चिनियाँ पक्षका अनुसार यी गतिविधिको उद्देश्य चीनको भूक्षेत्रीय सार्वभौमिकता तथा समुन्द्री अधिकार र हितको दृढतापूर्वक संरक्षण गर्नु हो।
