राष्ट्रिय पुनःएकीकरणको दृढ सुरक्षा कवच बन्नेछ चिनियाँ जनमुक्ति सेना : रक्षामन्त्री डोङ चुन

ड्रागन मिडिया समाचार कक्ष

चीनका रक्षामन्त्री डोङ चुनले चिनियाँ जनमुक्ति सेना देशको राष्ट्रिय पुनःएकीकरणका लागि दृढ सुरक्षा कवचका रूपमा उभिने र “ताइवान स्वतन्त्रता” सम्बन्धी पृथकतावादी गतिविधि तथा बाह्य सैन्य हस्तक्षेपका सबै प्रयासलाई निर्णायक रूपमा विफल पार्ने बताउनुभएको छ।

चिनियाँ जनमुक्ति सेनाको ९९ औँ स्थापना दिवसका अवसरमा जुलाई ३१ मा बेइजिङस्थित जनबृहत् सभाभवनमा आयोजित स्वागत समारोहलाई सम्बोधन गर्दै उहाँले राष्ट्रिय सार्वभौमिकता, सुरक्षा र विकाससम्बन्धी हितको रक्षा गर्नु सेनाको पवित्र जिम्मेवारी भएको स्पष्ट गर्नुभएको हो।

चीनको राष्ट्रिय रक्षा मन्त्रालयले आयोजना गरेको समारोहमा रक्षामन्त्री डोङले चिनियाँ जनमुक्ति सेनाले राष्ट्रिय पुनःएकीकरणको ऐतिहासिक लक्ष्यको संरक्षण गर्दै कुनै पनि पृथकतावादी वा बाह्य सैन्य चुनौतीप्रति दृढतापूर्वक प्रतिरोध गर्ने बताउनुभएको ग्लोबल टाइम्सले जनाएको छ।

उहाँले सन् २०२६ चिनियाँ कम्युनिस्ट पार्टी स्थापनाको १०५ औँ वर्ष तथा चिनियाँ लाल सेनाको दीर्घ अभियानमा विजय प्राप्त भएको ९० औँ वर्षसमेत भएको उल्लेख गर्नुभयो।

रक्षामन्त्री डोङका अनुसार जनताको सशस्त्र सेनाले आफ्नो गौरवशाली परम्परा र उत्कृष्ट कार्यशैलीलाई निरन्तर अघि बढाउँदै चिनियाँ कम्युनिस्ट पार्टीप्रतिको दृढ निष्ठा सुनिश्चित गरेको छ।

उहाँले सेनालाई सम्भावित सबै परिस्थितिको सामना गर्न उच्चस्तरीय तयारी अवस्थामा राखिने बताउँदै राष्ट्रिय प्रतिरक्षा र सशस्त्र सेनाको उच्च गुणस्तरीय आधुनिकीकरणलाई तीव्रता दिइने स्पष्ट गर्नुभयो।

उन्नत युद्ध क्षमता विकास, आधुनिक प्रविधिको प्रयोग, संयुक्त सञ्चालन क्षमता र बदलिँदो सुरक्षा परिस्थितिअनुकूल सैन्य तयारीलाई थप सुदृढ गरिने उहाँको भनाइ छ।

रक्षामन्त्री डोङले चिनियाँ सेना न्यायको पक्षमा उभिने तथा साझा आकाङ्क्षा राख्ने सबै शक्तिसँग सहकार्य गर्न तयार रहेको बताउनुभयो।

उहाँका अनुसार चिनियाँ सेना अन्तर्राष्ट्रिय तथा क्षेत्रीय शान्ति र स्थिरतालाई कमजोर पार्ने गतिविधिको संयुक्त रूपमा विरोध गर्न, विश्वव्यापी सुरक्षा चुनौतीको सामना गर्न र प्रमुख राष्ट्रको सेनाको जिम्मेवारी तथा प्रतिबद्धता व्यावहारिक कार्यमार्फत प्रदर्शन गर्न तयार छ।

चीनले आफ्नो राष्ट्रिय रक्षा नीति रक्षात्मक प्रकृतिको रहेको बताउँदै आएको छ। चिनियाँ पक्षले जनमुक्ति सेनाको आधुनिकीकरणलाई राष्ट्रिय सार्वभौमिकता, भूक्षेत्रीय अखण्डता, शान्तिपूर्ण विकास र जनताको सुरक्षाको सुनिश्चिततासँग जोडेर प्रस्तुत गरेको छ।

जनमुक्ति सेनाको ९९ औँ स्थापना दिवस सन् २०२७ मा पूरा हुने सेनाको शतवार्षिकी लक्ष्यअघिको महत्वपूर्ण ऐतिहासिक चरणका रूपमा हेरिएको छ।