रुसी एयरबोर्न फोर्सेस दिवसमा राष्ट्रपति पुटिनको शुभकामना, राष्ट्रिय सुरक्षामा योगदानको प्रशंसा
ड्रागन मिडिया समाचार कक्ष
रुसका राष्ट्रपति भ्लादिमिर पुटिनले एयरबोर्न फोर्सेसका वर्तमान तथा पूर्वसैनिकलाई उनीहरूको व्यावसायिक दिवसका अवसरमा शुभकामना दिनुभएको छ।
अगस्ट २ मा मनाइने एयरबोर्न फोर्सेस दिवसका अवसरमा जारी सन्देशमा राष्ट्रपति पुटिनले यस सैन्य बलका सदस्यको असाधारण साहस, दृढ मनोबल, अटल सङ्कल्प, भ्रातृत्वको भावना र पारस्परिक सहयोगको प्रशंसा गर्नुभएको छ।
उहाँले एयरबोर्न फोर्सेसको स्थापना गर्ने व्यक्तिहरू, पूर्वसैनिकका अविस्मरणीय योगदान तथा विगतका पुस्ताले हासिल गरेका उपलब्धिप्रति वर्तमान सैनिकले गौरव गर्ने गरेको उल्लेख गर्नुभएको छ।
राष्ट्रपति पुटिनले एयरबोर्न फोर्सेसका पूर्वसैनिकलाई नयाँ पुस्ताका लागि अनुकरणीय उदाहरणका रूपमा सम्मान गरिँदै आएको पनि बताउनुभएको छ।
विशेष सैन्य अभियान क्षेत्रमा अन्य सैनिक इकाइसँग मिलेर रुसको रक्षा गरिरहेका प्याराट्रुपरहरूको कुशल र दृढ कारवाहीलाई उहाँले विशेष रूपमा उल्लेख गर्नुभएको छ।
उहाँका अनुसार उनीहरूले अग्रपङ्क्तिका अत्यन्त संवेदनशील क्षेत्रमा साहस, वीरता र कर्तव्यनिष्ठा प्रदर्शन गरिरहेका छन्।
राष्ट्रपति पुटिनले एयरबोर्न फोर्सेसका सदस्यले भविष्यमा पनि आफूलाई सुम्पिएका जिम्मेवारी सम्मानपूर्वक पूरा गर्ने विश्वास व्यक्त गर्नुभएको छ।
उहाँले रुसको प्रतिरक्षा क्षमता, सार्वभौमिकता र राष्ट्रिय सुरक्षा सुदृढ बनाउन एयरबोर्न फोर्सेसले महत्वपूर्ण योगदान दिइरहने विश्वाससमेत व्यक्त गर्नुभएको छ।
