काङतिङ–सिन्तुच्याओ एक्सप्रेसवेका दुई सुरुङ छेडिए, सन् २०२८ मा छङ्तुबाट चार घण्टामै पुगिने

# पासाङ ल्हामु

चीनको सिचुआन प्रान्तस्थित काङतिङदेखि सिन्तुच्याओसम्म निर्माणाधीन एक्सप्रेसवेका दुई महत्वपूर्ण सुरुङ छेड्ने काम पूरा भएको छ। परियोजना सन् २०२८ मा सञ्चालनमा आएपछि छङ्तुदेखि सिन्तुच्याओसम्मको यात्रा सामान्य अवस्थामा करिब चार घण्टामा पूरा गर्न सकिनेछ।

जुलाई २५ मा सिन्तुच्याओ सुरुङ र वाचे सुरुङको दायाँतर्फको खण्ड एकै दिन छेडिएको हो। यी एक्सप्रेसवे परियोजनाअन्तर्गत निर्माण पूरा भएका प्रारम्भिक सुरुङ हुन्। यस सफलताले सडक सतह निर्माण, विद्युतीय तथा यान्त्रिक प्रणाली जडान र समग्र परियोजना सम्पन्न गर्ने कामलाई थप गति दिएको खाम्बा टिभीले जनाएको छ।

औसत तीन हजार मिटरभन्दा बढी उचाइमा निर्माण भइरहेको काङतिङ–सिन्तुच्याओ एक्सप्रेसवे राष्ट्रिय राजमार्ग ३१८ सँग समानान्तर रूपमा अघि बढिरहेको छ। कठिन हिमाली भूगोल हुँदै निर्माण भइरहेको यो सडकलाई सिचुआनको पश्चिमी उच्च भूभागमा यातायातको नयाँ ‘आकाशमार्ग’का रूपमा हेरिएको छ।

करिब ७८.५ किलोमिटर लामो परियोजनामा आठवटा सुरुङ र २२ वटा पुल निर्माण गरिँदै छन्। दुवैतर्फका सुरुङ मार्गसमेत जोड्दा कुल उत्खनन दूरी ९० किलोमिटरभन्दा बढी पुग्छ। परियोजनाको करिब ९५ प्रतिशत भाग समुद्री सतहबाट तीन हजार मिटरभन्दा माथि रहेको छ।

सबैभन्दा चुनौतीपूर्ण संरचना चतुओशान सुरुङ हो। करिब ८.४ किलोमिटर लामो यो सुरुङ निर्माण शुरु भएको आठ वर्ष बितिसक्दा पनि पूर्ण रूपमा छेडिएको छैन। कमजोर चट्टानी संरचना, भूमिगत पानी, अत्यधिक चिसो, न्यून अक्सिजन र छोटो निर्माण मौसमका कारण काम प्राविधिक रूपमा कठिन बनेको छ।

हाल छेडिएका वाचे र सिन्तुच्याओ सुरुङ पनि जटिल भूगर्भीय संरचना पार गर्दै निर्माण गरिएका हुन्। वाचे सुरुङको दायाँ खण्ड करिब तीन हजार चार मिटर तथा सिन्तुच्याओ सुरुङको दायाँ खण्ड करिब एक हजार ६४८ मिटर लामो छ।

सात दशकअघि छ्वान–सिचाङ राजमार्गका निर्माणकर्ताले फलामे घन, छिनो र सामान्य उपकरणको सहयोगमा राष्ट्रिय राजमार्ग ३१८ निर्माण गरेका थिए। अहिलेका इञ्जिनियर र श्रमिकले बुद्धिमान निर्माण उपकरण, आधुनिक सुरुङ प्रविधि तथा स्वचालित कङ्क्रिट प्रणाली प्रयोग गरेर त्यसै भूगोलमा नयाँ द्रुतमार्ग निर्माण गरिरहेका छन्।

प्रयोग गरिने उपकरण र प्रविधि परिवर्तन भए पनि कठिन भूगोलसँग सङ्घर्ष गर्ने निर्माणकर्ताको साहस र प्रतिबद्धता भने उस्तै रहेको परियोजनासम्बन्धी विवरणमा उल्लेख छ।

एक्सप्रेसवे सञ्चालनमा आएपछि काङतिङदेखि सिन्तुच्याओसम्मको यात्रा समय हालको करिब दुई घण्टाबाट एक घण्टामा झर्नेछ। छङ्तुबाट काङतिङ हुँदै सिन्तुच्याओसम्म निरन्तर द्रुतमार्ग सञ्जाल कायम हुनेछ।

नयाँ सडकले चतुओशान क्षेत्रमा हिउँ र बरफका कारण हुने सडक अवरोध तथा राष्ट्रिय राजमार्ग ३१८ मा देखिने नियमित सवारी चाप घटाउने अपेक्षा गरिएको छ। यसबाट मालवाहक यातायात सुरक्षित र नियमित हुनुका साथै कान्चे तिब्बती स्वायत्त प्रिफेक्चरको पर्यटन, स्थानीय अर्थतन्त्र र ग्रामीण पुनरुत्थानमा पनि सहयोग पुग्नेछ।

सन् २०२८ पछि यो मार्ग हुँदै यात्रुहरू छङ्तुबाट सिधै सिन्तुच्याओ पुग्न सक्नेछन्। हिमाली ‘आकाशमार्ग’ अब कठिन भूभागको प्रतीक मात्र रहने छैन, पुस्तौँको निरन्तर श्रमले निर्माण गरेको सहज र फराकिलो सम्पर्कमार्ग बन्नेछ।