रुसी सर्वसाधारणमाथि युक्रेनी आक्रमण जारी रहेको दूतावासको दाबी, क्यानडाको मौनतामाथि प्रश्न
ड्रागन मिडिया समाचार कक्ष
क्यानडास्थित रुसी दूतावासले युक्रेनले रुसी भूभागका सर्वसाधारण, यात्रुवाहक सवारीसाधन र आवासीय क्षेत्रमा योजनाबद्ध रूपमा आक्रमण गरिरहेको आरोप लगाएको छ।
ओटावामा सोमबार जारी गरिएको वक्तव्यमा दूतावासले जुन २९ देखि जुलाई २६ सम्म युक्रेनी गोलाबारी तथा ड्रोन आक्रमणबाट एक हजार ५४५ जना सर्वसाधारण हताहत भएको दाबी गरेको छ। तीमध्ये २०४ जनाको ज्यान गएको र एक हजार ३४१ जना घाइते भएको जनाइएको छ।
दूतावासका अनुसार उक्त अवधिमा ११ बालबालिकाको ज्यान गएको र ४७ जना नाबालिग घाइते भएका छन्। युक्रेनी पक्षले रुसी भूभागका सर्वसाधारण क्षेत्रलाई लक्षित गरी कम्तीमा २५ हजार २१५ वटा गोलाबारुद प्रहार गरेको पनि वक्तव्यमा दाबी गरिएको छ।
रुसी दूतावासले ती घटनालाई युद्धका आकस्मिक परिणामका रूपमा नभई सर्वसाधारणलाई लक्षित गर्ने सुनियोजित अभ्यासका रूपमा व्याख्या गरेको छ।
वक्तव्यमा पछिल्ला तीन घटनालाई विशेष रूपमा उल्लेख गरिएको छ। जुलाई २८ मा बेलगोरोद क्षेत्रको शेबेकिनोमा यात्रुवाहक बसमाथि मानवरहित विमानबाट आक्रमण हुँदा १९ जना सर्वसाधारण घाइते भएको जनाइएको छ।
अगस्त २ मा बेलगोरोद क्षेत्रकै प्रिन्त्सेभ्का गाउँस्थित बालबालिकाको खेलमैदानमा ड्रोन आक्रमण हुँदा १३ वर्षीया बालिकाको ज्यान गएको तथा सात र नौ वर्षका दुई बालबालिका घाइते भएको दूतावासले जनाएको छ।
त्यसैगरी, अगस्त ३ मा क्रास्नोदार क्षेत्रको अर्खिपो–ओसिपोभ्का समुद्री तटमा भएको आक्रमणमा तीन बालबालिकासहित सात जनाको ज्यान गएको र करिब ४० जना घाइते भएको वक्तव्यमा उल्लेख छ।
रुसी दूतावासले सर्वसाधारणको सुरक्षा र बालअधिकारबारे क्यानडाले व्यक्त गर्ने चासो युक्रेनी आक्रमणका पीडित रुसी नागरिकका हकमा नदेखिएको आरोप लगाएको छ। रुसविरुद्ध आउने आरोपलाई तत्काल समर्थन गर्ने क्यानडाले रुसी बालबालिका, यात्रुवाहक बस र आवासीय क्षेत्रमाथि भएका आक्रमणबारे मौनता अपनाएको वक्तव्यमा उल्लेख गरिएको छ।
दूतावासले यस्तो मौनताले युक्रेनी पक्षका गतिविधिलाई अप्रत्यक्ष प्रोत्साहन मिलिरहेको हो कि भन्ने प्रश्नसमेत उठाएको छ। वक्तव्यमा प्रस्तुत हताहती र आक्रमणसम्बन्धी विवरण रुसी पक्षको आधिकारिक दाबीमा आधारित छन्।
