चिनियाँ पर्यटकलाई क्यासिनोको आयआधार नबनाउन दक्षिण कोरियालाई चीनको आग्रह
ड्रागन मिडिया समाचार कक्ष
दक्षिण कोरियाको क्यासिनो उद्योगको वृद्धिमा चिनियाँ पर्यटकलाई प्रमुख आधारका रूपमा प्रस्तुत गरिएका सञ्चारमाध्यमका सामग्रीप्रति सोलस्थित चिनियाँ दूतावासले आपत्ति जनाएको छ। दूतावासले चिनियाँ पर्यटकलाई लक्षित गरी गरिने जुवासम्बन्धी प्रचार र ग्राहक आकर्षण गतिविधि रोक्न तथा क्यासिनो उद्योगमाथिको नियमन कडा बनाउन दक्षिण कोरियाली पक्षलाई आग्रह गरेको छ।
ग्लोबल टाइम्सका अनुसार चिनियाँ दूतावासका कन्सुलर मामिला हेर्ने काउन्सिलर थाङ ल्याङले दक्षिण कोरियाली समाचारपत्र द कोरिया टाइम्समा प्रकाशित लेखमार्फत चिनियाँ पर्यटकलाई क्यासिनो उद्योगको मुख्य ग्राहक र वृद्धिको प्रमुख स्रोत बनाउने अवधारणाको आलोचना गर्नुभएको हो। उहाँले यस्तो दृष्टिकोण चीन–दक्षिण कोरिया जनस्तरीय सम्बन्धका लागि हानिकारक र पुनर्विचार गर्नुपर्ने विषय भएको बताउनुभएको छ।
दूतावासले सोमबार आफ्नो आधिकारिक विच्याट खातामा सार्वजनिक गरेको सामग्रीमा चीन र दक्षिण कोरिया दुवैले जुवासम्बन्धी गतिविधिमा कानुनी तथा नीतिगत प्रतिबन्ध लगाएको उल्लेख गरिएको छ। दक्षिण कोरियाले आफ्ना नागरिकलाई अधिकांश क्यासिनोमा प्रवेश गर्न निषेध गरेको छ भने चीनले जुवाप्रति शून्य सहनशीलताको नीति अपनाउँदै आफ्ना नागरिकलाई विदेशमा समेत जुवा खेल्न निषेध गरेको दूतावासले जनाएको छ।
यस्तो कानुनी अवस्थाबीच दक्षिण कोरियाली क्यासिनोहरूले विदेशी नागरिक, विशेषगरी चिनियाँ पर्यटकलाई लक्षित गरेर प्रचार, सम्पर्क र ग्राहक भर्ती गर्नु अनुचित भएको चिनियाँ पक्षको भनाइ छ। दूतावासले जुवा उद्योगलाई स्वस्थ र रचनात्मक जनस्तरीय आदानप्रदानको क्षेत्र मान्न नसकिने स्पष्ट गरेको छ।
चीन र दक्षिण कोरियाका सम्बन्धित निकायले सीमापार जुवासम्बन्धी अपराध नियन्त्रण गर्न विगतदेखि सहकार्य गर्दै आएको उल्लेख गर्दै दूतावासले क्यासिनोका कारण उत्पन्न हुने आर्थिक, सामाजिक र मानवीय क्षतिप्रति गम्भीर ध्यान दिन आग्रह गरेको छ। जुवासँग सम्बन्धित घटनाले चिनियाँ नागरिकको वैधानिक अधिकार, व्यक्तिगत सुरक्षा र सम्पत्तिमा क्षति पुर्याउनुका साथै दक्षिण कोरियाको पर्यटन बजारको व्यवस्था र अन्तर्राष्ट्रिय छविलाई समेत प्रभावित गर्न सक्ने चिन्ता व्यक्त गरिएको छ।
दूतावासका अनुसार चीन र दक्षिण कोरिया निकट छिमेकी मुलुक हुन्। दुवै देशले मानिसहरूको आवतजावत सहज बनाउन र पर्यटनमार्फत आर्थिक विकास प्रवर्द्धन गर्न लागू गरेका भिसा सहजीकरणका उपायले पारस्परिक समझदारी र मित्रता विस्तार गर्न सहयोग पुर्याएका छन्।
तर विदेशी पर्यटकबाट जुवा उद्योगमार्फत नाफा कमाउने प्रयास अल्पदृष्टिपूर्ण र हानिकारक हुने तथा त्यसले दुई देशका जनताबीचको मित्रवत भावनालाई क्रमशः कमजोर बनाउन सक्ने चिनियाँ दूतावासले चेतावनी दिएको छ।
चीनले विदेश भ्रमणमा जाने आफ्ना नागरिकलाई जुवासम्बन्धी कानुनी सीमाबारे थप सचेत गराउने र आत्मअनुशासन पालना गर्न प्रेरित गर्ने जनाएको छ। चिनियाँ कानुनले विदेशमा जुवा खेल्ने मात्र नभई चिनियाँ नागरिकलाई विदेशमा जुवा खेल्न सङ्गठित वा प्रोत्साहित गर्ने गतिविधिलाई पनि अपराधका रूपमा लिएको द कोरिया टाइम्सले जनाएको छ।
चिनियाँ दूतावासले दक्षिण कोरियाली सरकारलाई पर्यटन संस्था र क्यासिनो सञ्चालकहरूको प्रभावकारी अनुगमन गर्न, सञ्चालन प्रणालीलाई कडाइका साथ व्यवस्थित गर्न तथा चिनियाँ पर्यटक लक्षित जुवासम्बन्धी प्रचार र ग्राहक भर्ती पूर्ण रूपमा रोक्न आग्रह गरेको छ।
