चिनियाँ मुख्यभूमि र हङकङबीच पूँजीबजार सहकार्य विस्तार गर्न नयाँ उपाय घोषणा
ड्रागन मिडिया समाचार कक्ष
चाइना सेक्युरिटिज रेगुलेटरी कमिसन र चीनको हङकङ विशेष प्रशासनिक क्षेत्रको सेक्युरिटिज एन्ड फ्युचर्स कमिसनले दुई बजारबीच व्यावहारिक सहकार्य र समन्वित विकासलाई थप गहिरो बनाउन नयाँ उपायहरूको श्रृंखला संयुक्त रूपमा घोषणा गरेका छन्।
सोमबार सार्वजनिक गरिएका उपायअन्तर्गत मापदण्ड पूरा गरेका चिनियाँ मुख्यभूमिका कम्पनीलाई हङकङमा शेयर सूचीकरण गर्न सहयोग गरिनेछ। त्यसैगरी, हङकङमा सूचीबद्ध योग्य कम्पनीलाई चिनियाँ मुख्यभूमिका धितोपत्र बजारबाट पूँजी जुटाउन तथा त्यहाँ संस्थागत ऋणपत्र जारी गर्न प्रोत्साहित गरिनेछ।
यस व्यवस्थाले मुख्यभूमि र हङकङका पूँजीबजारबीच कम्पनीहरूको पहुँच विस्तार गर्दै सीमापार वित्तीय स्रोत परिचालनलाई सहज बनाउने अपेक्षा गरिएको छ। विशेषगरी गुणस्तरीय हङकङ कम्पनीलाई मुख्यभूमिको पूँजीबजारका विविध वित्तीय उपकरण प्रयोग गरी नवीन विकास अगाडि बढाउन सहयोग पुग्ने चिनियाँ नियामक पक्षको भनाइ छ।
दुवै पक्षका सूचकाङ्क निर्माण गर्ने संस्थाहरूलाई सहकार्य गरी चिनियाँ सम्पत्तिमा आधारित थप सूचकाङ्क विकास गर्न पनि प्रोत्साहन गरिनेछ। यसबाट चिनियाँ सूचकाङ्क र वित्तीय सम्पत्तिको अन्तर्राष्ट्रिय पहिचान तथा विश्वव्यापी प्रभाव विस्तार गर्ने लक्ष्य राखिएको छ।
हङकङका धितोपत्र तथा वायदा क्षेत्रका योग्य पेशाकर्मीले चिनियाँ मुख्यभूमिमा व्यावसायिक अभ्यास गर्न आवश्यक अनुमतिपत्र प्राप्त गर्ने प्रक्रियालाई थप सरल र सहज बनाइने संयुक्त घोषणामा उल्लेख छ। यसले दुवै बजारबीच वित्तीय जनशक्ति, विशेषज्ञता र व्यावसायिक सेवाको आवागमनलाई बलियो बनाउने अपेक्षा गरिएको छ।
दुवै नियामक निकायले बजार जोखिमको अनुगमन, नियामकीय सूचनाको आदानप्रदान र अन्तर्राष्ट्रिय वित्तीय शासनसम्बन्धी सहकार्यलाई पनि सुदृढ बनाउने प्रतिबद्धता जनाएका छन्। यसअन्तर्गत सीमापार वित्तीय गतिविधिबाट उत्पन्न हुन सक्ने जोखिमको समयमै पहिचान र व्यवस्थापनमा समन्वय बढाइनेछ।
नयाँ उपायहरूले हङकङको अन्तर्राष्ट्रिय वित्तीय केन्द्रको भूमिकालाई थप सुदृढ बनाउनुका साथै चिनियाँ मुख्यभूमिको पूँजीबजारलाई बाह्य बजारसँग जोड्ने हङकङको सेतुको भूमिकालाई अझ प्रभावकारी बनाउने अपेक्षा गरिएको छ।
