फारसको खाडीमा युद्धविराम र वार्ता पुनः शुरु गर्न रुस–कतारको आह्वान
ड्रागन मिडिया समाचार कक्ष
रुसी विदेशमन्त्री सेर्गेई लाभरोभ र कतारका प्रधानमन्त्री तथा विदेशमन्त्री शेख मोहम्मद बिन अब्दुलरहमान अल थानीबीच रुस–कतार सम्बन्धको विस्तार तथा फारसको खाडीमा जारी तनावबारे टेलिफोन संवाद भएको छ।
रुसी विदेश मन्त्रालयका अनुसार अगस्ट ४ मा भएको संवादमा दुवै नेताले परम्परागत मित्रवत रुस–कतार सम्बन्धलाई थप विकास गर्ने प्रमुख क्षेत्रबारे विस्तृत छलफल गर्नुभएको थियो।
उहाँहरूले नियमित र आपसी विश्वासमा आधारित राजनीतिक संवाद कायम राख्ने तथा व्यापार, अर्थतन्त्र, लगानी, संस्कृति र मानवीय क्षेत्रमा सहयोग विस्तार गर्ने प्रतिबद्धता पुनः पुष्टि गर्नुभएको छ।
संवादका क्रममा मध्यपूर्वको वर्तमान अवस्थाबारे विचार आदानप्रदान गर्दै फारसको खाडीमा निरन्तर बढिरहेको तनावमा विशेष ध्यान दिइएको रुसी विदेश मन्त्रालयले जनाएको छ।
लाभरोभ र अल थानीले शत्रुतापूर्ण कारवाही तत्काल अन्त्य गर्नुपर्ने तथा जुन १७ मा हस्ताक्षर गरिएको इस्लामाबाद ज्ञापनका आधारमा वार्ता यथाशीघ्र पुनः शुरु गर्नुपर्नेमा जोड दिनुभएको छ।
दुवै पक्षले सैन्य तनावको निरन्तरताले मध्यपूर्वको सुरक्षा र स्थिरतामा थप जोखिम सिर्जना गर्ने संकेत गर्दै राजनीतिक तथा कूटनीतिक प्रक्रियालाई पुनः सक्रिय बनाउनु आवश्यक रहेको धारणा राख्नुभएको छ।
टेलिफोन संवादले क्षेत्रीय संकट समाधानका लागि वार्ता र कूटनीतिलाई प्राथमिकता दिने तथा द्विपक्षीय राजनीतिक र आर्थिक सम्बन्धलाई समानान्तर रूपमा सुदृढ बनाउने मस्को र दोहाको साझा प्रतिबद्धता पुनः पुष्टि गरेको छ।
