चिनियाँ नयाँ ऊर्जा सवारी उद्योग उत्पादन निर्यातबाट विश्वव्यापी स्थानीय सहकार्यतर्फ
ड्रागन मिडिया समाचार कक्ष
विश्वको सबैभन्दा ठूलो नयाँ ऊर्जा सवारी निर्यातकर्ता चीनले तयार सवारी विदेश पठाउने परम्परागत ढाँचाबाट स्थानीय उत्पादन, प्रविधि साझेदारी, सेवा सञ्जाल र समग्र औद्योगिक पारिस्थितिक प्रणाली निर्माणतर्फ आफ्नो विश्वव्यापी रणनीति विस्तार गरेको छ।
चिनियाँ सरकारी समाचार संस्था सिन्ह्वाका अनुसार चीनका प्रमुख बन्दरगाहबाट ठूलो संख्यामा विद्युतीय सवारी निर्यात भइरहे पनि चिनियाँ कम्पनीहरूले अब सवारी बिक्रीलाई मात्र अन्तिम उद्देश्य मानेका छैनन्। उनीहरूले विदेशी बजारमा उत्पादन केन्द्र, अनुसन्धान तथा विकास सहकार्य, पार्टपुर्जा भण्डारण, बिक्रीपछिको सेवा र स्थानीय रोजगारी सिर्जनालाई प्राथमिकता दिन थालेका छन्।
चाइना एसोसिएसन अफ अटोमोबाइल म्यानुफ्याक्चरर्सको तथ्याङ्कअनुसार चीनले सन् २०२५ मा २६ लाख १५ हजार नयाँ ऊर्जा सवारी निर्यात गरेको थियो, जुन अघिल्लो वर्षको तुलनामा १०३.७ प्रतिशत बढी हो। सन् २०२६ को पहिलो छ महिनामै निर्यात २३ लाख ५५ हजार पुगेको छ, जुन वार्षिक आधारमा १२० प्रतिशत वृद्धि हो। नयाँ ऊर्जा सवारी चीनको निर्यात वृद्धिको प्रमुख आधारमध्ये एक बनेको छ।
चिनियाँ विद्युतीय सवारीलाई अब सस्तो विकल्पका रूपमा मात्र नभई कार्यक्षमता, बुद्धिमान सुविधा, सुरक्षा, प्रविधि र डिजाइनका आधारमा प्रतिस्पर्धी उत्पादनका रूपमा हेरिन थालेको सिन्ह्वाले जनाएको छ।
एक्सपेङ मोटर्सले सन् २०२५ मा विदेशमा ४५ हजारभन्दा बढी सवारी हस्तान्तरण गरेको थियो, जुन अघिल्लो वर्षको तुलनामा ९६ प्रतिशत बढी हो। कम्पनीले सन् २०२८ सम्म ल्याटिन अमेरिकी बजारमा आफ्नो उपस्थिति विस्तार गर्ने तीनवर्षे योजना पनि अघि सारेको छ। एक्सपेङको आधिकारिक विवरणले समेत सन् २०२५ को विदेशी बिक्री ४५ हजारभन्दा माथि पुगेको पुष्टि गरेको छ।
जीएसी समूहले सन् २०२६ को पहिलो छ महिनामा आफ्नै ब्रान्डका एक लाख २१ हजार ५०० सवारी निर्यात गरेको छ, जुन वार्षिक आधारमा १३२ प्रतिशत वृद्धि हो। कम्पनीले सन् २०२६ मा दुई लाख ५० हजार र सन् २०३० सम्म वार्षिक दस लाख सवारी निर्यात गर्ने लक्ष्य राखेको छ। उसले भविष्यमा १२० देश तथा क्षेत्रमा उपस्थिति विस्तार गर्ने योजना बनाएको छ।
बीवाईडी, जीएसी र एक्सपेङजस्ता कम्पनीले तयार सवारी निर्यातसँगै प्रविधि इजाजतपत्र, स्थानीय उत्पादन र अन्तर्राष्ट्रिय ब्रान्ड निर्माणलाई जोड दिएका छन्। सिन्ह्वाका अनुसार बीवाईडीले आफ्नो ई–प्लेटफर्म ३.० र ब्लेड ब्याट्री प्रविधिमार्फत अन्तर्राष्ट्रिय कम्पनीसँग सहकार्य विस्तार गरेको छ। दक्षिणपूर्वी एशियाका विभिन्न बजारमा चिनियाँ विद्युतीय सवारी प्रविधि र चार्जिङ मापदण्डको प्रयोग पनि बढिरहेको छ। बीवाईडीले आफ्नो ई–प्लेटफर्मलाई विश्वव्यापी विद्युतीय सवारी उद्योगका लागि खुला राख्ने नीति सार्वजनिक गरिसकेको छ।
एक्सपेङले पनि बुद्धिमान ड्राइभिङ प्रणाली र आफैँले विकास गरेको ट्युरिङ एआई चिपसम्बन्धी प्रविधि फक्सवागनसँगको सहकार्यमा विश्वव्यापी प्रयोगतर्फ लैजाने योजना बनाएको छ। यस्तो प्रविधि साझेदारीले विदेशी कम्पनीको विद्युतीय सवारी विकास प्रक्रिया तीव्र बनाउनुका साथै चिनियाँ प्रविधिको अन्तर्राष्ट्रिय उपयोग विस्तार गर्ने अपेक्षा गरिएको छ।
चिनियाँ कम्पनीहरूले युरोप, दक्षिणपूर्वी एशिया, मध्यपूर्व र ल्याटिन अमेरिकामा ब्रान्ड अनुभव केन्द्र, मर्मत सेवा, बिक्रीपछिको सहयोग तथा क्षेत्रीय पार्टपुर्जा गोदाम स्थापना गरिरहेका छन्। यसबाट सवारी मर्मतको समय र लागत घट्नुका साथै स्थानीय प्राविधिक रोजगारी र विद्युतीय सवारी सेवा उद्योगको विकासमा सहयोग पुगेको छ।
जीएसीले युरोप, थाइल्यान्ड र पानामामा हजारौँ पार्टपुर्जा राख्न सकिने क्षेत्रीय गोदाम स्थापना गरेको छ। कम्पनीले मेक्सिकोमा विद्युतीय सवारीको प्रयोग, चार्जिङ पूर्वाधार र न्यून उत्सर्जनयुक्त यातायात प्रवर्द्धन गर्ने स्थानीय संस्थासँग सहकार्य पनि थालेको छ।
चाइना एसोसिएसन अफ अटोमोबाइल म्यानुफ्याक्चरर्सका उपमहासचिव छन शिह्वाले चीनको मजबुत आपूर्ति श्रृंखला, ठूलो उत्पादन क्षमता र बुद्धिमान ककपिट तथा स्वचालित ड्राइभिङ प्रविधिको तीव्र सुधारलाई निर्यात वृद्धिको प्रमुख कारण बताउनुभएको छ।
उहाँका अनुसार यिनै क्षमताले चिनियाँ नयाँ ऊर्जा सवारीको अन्तर्राष्ट्रिय प्रतिस्पर्धात्मकता बढाउनुका साथै विभिन्न देशका उपभोक्ताको आवश्यकता अनुकूल उत्पादन विकास गर्न सहयोग पुर्याएको छ। चिनियाँ उद्योगको पछिल्लो रणनीतिले सवारी निर्यातलाई स्थानीय लगानी, रोजगारी, प्रविधि हस्तान्तरण र हरित रूपान्तरणसँग जोडिएको दीर्घकालीन सहकार्यमा परिवर्तन गरिरहेको छ।
