सिंगापुरका व्यवसायीको प्रमुख चिन्ता बढ्दो लागत, भू–राजनीतिक तनावले थप्यो अनिश्चितता

ड्रागन मिडिया समाचार कक्ष

सिंगापुरका कम्पनीहरूका लागि बढ्दो व्यवसाय सञ्चालन लागत सबैभन्दा ठूलो चिन्ताको विषय बनेको छ। भू–राजनीतिक तनाव र विश्व अर्थतन्त्रमा कायम अनिश्चितताले व्यवसायिक विश्वासमा समेत दबाब सिर्जना गरेको एक सर्वेक्षणले देखाएको छ।

सिंगापुर चाइनिज चेम्बर अफ कमर्स एन्ड इन्डस्ट्रीले बुधबार सार्वजनिक गरेको सर्वेक्षणअनुसार ७१.८ प्रतिशत उत्तरदाताले बढ्दो व्यवसायिक लागतलाई प्रमुख चिन्ताका रूपमा उल्लेख गरेका छन्।

त्यसपछि उपयुक्त जनशक्ति उपलब्धताको समस्या तथा नयाँ विकास अवसर समेट्न व्यवसायलाई रुपान्तरण गर्नुपर्ने आवश्यकता प्रमुख चुनौतीका रूपमा देखिएका छन्।

मध्यपूर्वमा जारी द्वन्द्वले पनि व्यवसायिक अनिश्चितता थप बढाएको सर्वेक्षणले देखाएको छ। उत्तरदाताले सञ्चालन लागत वृद्धि, बजार अनिश्चितता, मागमा कमजोरी र आपूर्ति श्रृंखलामा अवरोधलाई मुख्य जोखिमका रूपमा पहिचान गरेका छन्।

व्यवसायीहरू आगामी अवस्थाप्रति पनि बढी सतर्क देखिएका छन्। सर्वेक्षणमा सहभागीमध्ये ३८ प्रतिशतले व्यवसायिक सम्भावनाप्रति तटस्थ धारणा राखेका छन् भने ३४ प्रतिशत निराशावादी र २० प्रतिशत मात्रै आशावादी देखिएका छन्।

कमजोर व्यवसायिक मनोभावसँगै यस वर्ष आम्दानी वृद्धि हुने अपेक्षा गर्ने कम्पनीको अनुपात पनि घटेको छ। केवल ३४ प्रतिशत व्यवसायले यस वर्ष आम्दानी बढ्ने अपेक्षा गरेका छन्, जुन सन् २०२५ मा ३९ प्रतिशत थियो।

यद्यपि ७८ प्रतिशत व्यवसायले नाफामा रहने अपेक्षा गरेका छन्। तर त्यसमध्ये आधाभन्दा बढीले गत वर्षको तुलनामा नाफा घट्ने अनुमान गरेका छन्।

सर्वेक्षणले सिंगापुरका कम्पनीहरूका लागि मलेसिया, इन्डोनेसिया, चीन, भियतनाम र थाइल्यान्ड विदेशी बजार विस्तारका प्रमुख गन्तव्यका रूपमा देखिएको पनि जनाएको छ।

यसैबीच, ४५ प्रतिशत उत्तरदाताले बजारमा सहजै उपलब्ध कृत्रिम बौद्धिकता (एआई) उपकरणको परीक्षण तथा प्रयोग गरिरहेको बताएका छन्। तर पर्याप्त प्राविधिक दक्षताको अभाव र कार्यान्वयन लागत एआईको व्यापक प्रयोगका प्रमुख अवरोधका रूपमा देखिएका छन्।