जापानको घरायसी खर्च लगातार सातौँ महिना घट्यो
ड्रागन मिडिया समाचार कक्ष
जापानमा घरपरिवारको खर्च जुन महिनामा मूल्यवृद्धि समायोजनपछिको वास्तविक आधारमा अघिल्लो वर्षको सोही अवधिको तुलनामा ३.३ प्रतिशतले घटेको छ। यससँगै जापानको घरायसी खर्च लगातार सातौँ महिना ओरालो लागेको सरकारी तथ्यांकले देखाएको छ।
जापानको आन्तरिक मामिला तथा सञ्चार मन्त्रालयले शुक्रबार सार्वजनिक गरेको तथ्यांकअनुसार आँधी, भारी वर्षा र तुलनात्मक रूपमा कम तापक्रमलगायत प्रतिकूल मौसमले उपभोक्ता खर्च घटाउन भूमिका खेलेको छ।
जुन महिनामा दुई वा सोभन्दा बढी सदस्य भएका परिवारले औसत २ लाख ९० हजार ८८६ येन, अर्थात करिब १ हजार ८४० अमेरिकी डलर खर्च गरेका छन्।
खाद्य तथा पेय पदार्थतर्फको खर्च २.५ प्रतिशतले घटेको छ। अघिल्लो वर्षको तुलनामा तापक्रम कम रहँदा चिया पेय तथा खेलकुद पेय पदार्थको बिक्री घटेको मन्त्रालयले जनाएको छ।
बाहिर खाना खाने खर्च २.९ प्रतिशतले घटेको छ। यो तीन महिनापछि देखिएको पहिलो गिरावट हो। आँधी तथा वर्षायामका कारण उपभोक्ताको बाहिरी गतिविधि प्रभावित भएको मन्त्रालयका एक अधिकारीले बताएका छन्।
दैनिक उपभोग्य वस्तुतर्फको खर्च ८ प्रतिशतले घटेको छ, जुन चार महिनापछि पहिलो गिरावट हो। मध्यपूर्वमा बढेको तनावका कारण मार्चदेखि प्लास्टिकका झोला तथा प्लास्टिक र्यापजस्ता वस्तु सञ्चय गर्ने प्रवृत्ति बढेकोमा जुनसम्म आइपुग्दा त्यस्तो सञ्चय घटेको तथ्यांकले देखाएको छ।
यातायात तथा सञ्चारतर्फको खर्च ५.७ प्रतिशतले घटेको छ। हवाई तथा रेल भाडासम्बन्धी खर्चमा आएको कमीले यसमा प्रभाव पारेको छ। प्रतिकूल मौसमले यात्रालाई समेत निरुत्साहित गरेको हुन सक्ने मन्त्रालयको आकलन छ।
जापानमा घरायसी खर्च निजी उपभोगको महत्वपूर्ण सूचक हो। निजी उपभोगले देशको कुल गार्हस्थ्य उत्पादन (जीडीपी) को आधाभन्दा बढी हिस्सा ओगट्छ।
यसैबीच, कम्तीमा दुई सदस्य भएका तलबभोगी परिवारको औसत मासिक आम्दानी वास्तविक आधारमा २ प्रतिशतले वृद्धि भई १० लाख १३ हजार ९८६ येन पुगेको मन्त्रालयले जनाएको छ।
