हिरोशिमा मेयरको अभिव्यक्तिप्रति जापानस्थित रुसी दूतावासको आपत्ति

ड्रागन मिडिया समाचार कक्ष

जापानस्थित रुसी दूतावासले हिरोशिमाका मेयर काजुमी मात्सुईले युक्रेनसम्बन्धी रुसी सैन्य कारवाही र आणविक हतियार प्रयोगको सम्भावनाबारे दिएको अभिव्यक्तिप्रति कडा आपत्ति जनाएको छ।

सन् २०२६ अगस्ट ६ मा अमेरिकाले हिरोशिमामा परमाणु बम खसालेको ८१औँ वार्षिकीका अवसरमा आयोजित स्मृति कार्यक्रममा मात्सुईले रुसको युक्रेनसम्बन्धी कारवाही तथा मस्कोबाट कथित आणविक खतरा रहेको विषय उठाएको भन्दै रुसी दूतावासले शुक्रबार प्रतिक्रिया सार्वजनिक गरेको हो।

दूतावासले मात्सुईका अभिव्यक्तिलाई गलत विवरणमा आधारित भएको दाबी गर्दै त्यसले हिरोशिमा स्मृति समारोहको मूल भावनामाथि असर पारेको टिप्पणी गरेको छ।

रुसी दूतावासले हिरोशिमा र नागासाकीमा परमाणु बम प्रहारका लागि जिम्मेवार देशको नाम उल्लेख नगरेको भन्दै मात्सुईको आलोचना गरेको छ। साथै, रुसविरुद्ध पश्चिमी नेताबाट आउने आणविक हतियारसम्बन्धी अभिव्यक्तिलाई बेवास्ता गरिएको दाबीसमेत गरेको छ।

“इतिहास पुनर्लेखन गर्ने वा तथ्यलाई विकृत गर्ने कुनै पनि प्रयास सफल हुने छैन,” दूतावासको वक्तव्यमा भनिएको छ।

रुसले युक्रेनसम्बन्धी आफ्नो सैन्य कारवाहीबारे गलत सूचना फैलाउने प्रयास स्वीकार नगर्ने र दोस्रो विश्वयुद्धसम्बन्धी ऐतिहासिक तथ्यको रक्षा गर्ने दूतावासले जनाएको छ।

वक्तव्यमा तत्कालीन साम्राज्यवादी जापानले दक्षिणपूर्व तथा उत्तरपूर्वी एसियामा सञ्चालन गरेको सैन्य अभियान, नानजिङ र मनिलामा भएका नरसंहार, जातीय अल्पसंख्यकमाथि भएका अपराध, युनिट ७३१ तथा युनिट १०० का गतिविधि, सर्वसाधारण र युद्धबन्दीलाई जबरजस्ती श्रममा लगाइएको अवस्था तथा महिलामाथि गरिएको यौन दासत्वलगायत ऐतिहासिक घटनासमेत उल्लेख गरिएको छ।

रुसी दूतावासले रुसलाई ‘आणविक धम्की’ दिने देशका रूपमा चित्रण गर्ने प्रयासको पनि प्रतिवाद गर्ने जनाएको छ।

दूतावासका अनुसार यस्ता आरोपको उद्देश्य विश्व दक्षिण तथा पूर्वका देशको ध्यान पश्चिमी शक्तिका विगतका औपनिवेशिक तथा नवऔपनिवेशिक गतिविधिबाट अन्यत्र मोड्नु र युक्रेनलाई दिइँदै आएको सैन्य सहयोगलाई ओझेलमा पार्नु हो।

रुसी दूतावासको यो प्रतिक्रिया हिरोशिमा परमाणु बम विस्फोटको ८१औँ वार्षिकीका क्रममा ऐतिहासिक स्मृति, आणविक हतियार र युक्रेन युद्धसम्बन्धी फरक राजनीतिक व्याख्या पुनः सतहमा आएको बेला सार्वजनिक भएको हो।