नेपाल–रुस कूटनीतिक सम्बन्धको ७०औँ वर्षमा ‘Nepal–Russia: Dimensions of Bilateral Relations’ पुस्तक सार्वजनिक
ड्रागन मिडिया सम्वाददाता
नेपाल र रुसबीच कूटनीतिक सम्बन्ध स्थापना भएको ७०औँ वार्षिकोत्सवका अवसरमा रामबिन्दु श्रेष्ठद्वारा लिखित ‘Nepal–Russia: Dimensions of Bilateral Relations’ पुस्तक सार्वजनिक गरिएको छ।
नेपाल–रुस साहित्य समाजका अध्यक्ष तथा कार्यक्रमका सभापति विष्णु बी. सिंह, नेपालस्थित रुसी महासंघको दूतावासका मन्त्री–परामर्शदाता तथा प्रमुख अतिथि रिन्चेन राक्षाएभ, रुसका लागि नेपालका पूर्वराजदूत मिलनराज तुलाधर, नेपाल भाषा एकेडेमीका कुलपति कृष्णसुन्दर मल्ल, रुसी महासंघको दूतावासकी परामर्शदाता तथा काठमाडौंस्थित रसियन हाउसकी प्रमुख अनास्तासिया खोख्लोभा, रुसका लागि नेपालका पूर्वराजदूत हिरण्यलाल श्रेष्ठ, नेपाल–रुस साहित्य समाजका उपाध्यक्ष चन्द्रकान्त आचार्य तथा लेखक रामबिन्दु श्रेष्ठलगायत विशिष्ट व्यक्तित्वको उपस्थितिमा पुस्तक सार्वजनिक गरिएको हो।
कार्यक्रमको शुरुवात विशिष्ट अतिथिलाई परम्परागत खादा अर्पण गरेर गरिएको थियो। समारोहमा कूटनीतिज्ञ, विद्वान, साहित्यकार, प्राज्ञिक व्यक्तित्व तथा नेपाल–रुस सम्बन्धका शुभेच्छुकहरूको सहभागिता रहेको थियो।
प्रमुख अतिथि मन्त्री–परामर्शदाता राक्षाएभले दुई देशबीच सांस्कृतिक सम्बन्ध सुदृढ बनाउन साहित्यले महत्वपूर्ण भूमिका निर्वाह गर्ने बताए। उनले नेपाल र रुसबीच लामो समयदेखि कायम कूटनीतिक सम्बन्धलाई स्मरण र अभिलेखीकरण गर्ने दिशामा पुस्तकको प्रकाशन महत्वपूर्ण कदम भएको उल्लेख गरे।
रुसका लागि नेपालका पूर्वराजदूत मिलनराज तुलाधर र हिरण्यलाल श्रेष्ठ तथा नेपाल भाषा एकेडेमीका कुलपति कृष्णसुन्दर मल्लले पुस्तकले नेपाल–रुस सम्बन्धका विभिन्न आयामलाई दस्तावेजीकरण गर्न महत्वपूर्ण योगदान पुर्याउने बताए।
काठमाडौंस्थित रसियन हाउसकी प्रमुख खोख्लोभाले कार्यक्रमलाई दुई देशबीचको सांस्कृतिक सहकार्यको सुन्दर उदाहरणका रूपमा वर्णन गर्दै पुस्तकलाई नेपाल र रुसको साझा सम्पदाको संग्रहमा थपिएको महत्वपूर्ण कृतिका रूपमा उल्लेख गरिन्।
नेपाल र तत्कालीन सोभियत संघबीच सन् १९५६ मा स्थापित कूटनीतिक सम्बन्धको ७०औँ वार्षिकोत्सव स्मरण गर्दै प्रकाशित पुस्तकमा दुई देशबीचको कूटनीतिक सम्बन्धको इतिहास, आर्थिक सहकार्य, सांस्कृतिक तथा साहित्यिक आदानप्रदान, पर्यटन र द्विपक्षीय सम्बन्ध विकासमा दुवै देशले पुर्याएको योगदानका विभिन्न पक्ष समेटिएका छन्।
कार्यक्रममा ‘रुस–नेपाल ७०औँ वार्षिकोत्सव स्मारक कविता संग्रह’मा योगदान पुर्याएका लेखक तथा साहित्यकारलाई प्रमुख अतिथिले प्रशंसापत्र प्रदान गरेका थिए।
त्यसैगरी ‘About the Motherland and Love’ कविता संग्रहमा योगदान पुर्याएका २० नेपाली महिला कवि तथा दुई नेपाली कवि–अनुवादकलाई पनि प्रशंसापत्र प्रदान गरिएको थियो। ती प्रशंसापत्र नेपालसँग सहयोग तथा मैत्री समाज (OSDN) का ट्रस्टी बोर्ड अध्यक्ष, दुईपटक ‘सोभियत संघका हिरो’ सम्मान प्राप्त अन्तरिक्षयात्री भी.ए. झानिबेकोभ तथा OSDN अध्यक्ष एम.एस. नेक्रासोभले हस्ताक्षर गरेका थिए।
कार्यक्रमको अन्त्यमा नेपाल–रुस साहित्य समाजका अध्यक्ष विष्णु बी. सिंहले पुस्तक प्रकाशन तथा समारोहलाई सफल बनाउन योगदान पुर्याउने सबैप्रति आभार व्यक्त गरे।
नेपाल–रुस कूटनीतिक सम्बन्धको ७०औँ वर्षका अवसरमा सार्वजनिक गरिएको यो पुस्तकले दुई देशबीच सात दशकमा विकसित राजनीतिक, कूटनीतिक, आर्थिक, साहित्यिक र सांस्कृतिक सम्बन्धलाई एउटै कृतिमा समेट्ने प्रयास गरेको छ।
