माइनस ३९ डिग्रीमा छायाङ्कन गरिएको ‘Survive in the Ice’ पोस्ट–प्रोडक्सनमा, डिसेम्बरसम्म निर्माण पूरा गर्ने तयारी

ड्रागन मिडिया समाचार कक्ष

रुसी चलचित्र स्टुडियो मोसफिल्मको नयाँ मनोवैज्ञानिक एक्सन–थ्रिलर ‘Survive in the Ice’ को छायाङ्कनपछि पोस्ट–प्रोडक्सनको महत्वपूर्ण चरण शुरु भएको छ। मोसफिल्मले शुक्रबार सार्वजनिक गरेको विवरणअनुसार चलचित्रको संवाद तथा ध्वनि रेकर्डिङ, साउन्ड मिक्सिङ, कलर करेक्सन र जटिल कम्प्युटर ग्राफिक्समा अहिले काम भइरहेको छ।

सन् १९८० को दशकको शुरुवातलाई पृष्ठभूमि बनाइएको चलचित्रको कथा अन्टार्कटिकास्थित काल्पनिक सोभियत ध्रुवीय अनुसन्धान केन्द्र ‘भोस्कोद’का कर्मचारी वरिपरि केन्द्रित छ। अत्यन्त कठिन हिउँदे परिस्थितिमा फसेका उनीहरूले कठोर चिसोसँग मात्र होइन, आफ्नै डर, मनोवैज्ञानिक दबाब र जीवनरक्षाको चुनौतीसँग पनि सामना गर्नुपर्छ।

मोसफिल्मका अनुसार ‘भोस्कोद’लाई कुनै एउटा वास्तविक स्टेशनको प्रतिलिपिका रूपमा नभई सोभियतकालीन अन्टार्कटिक अनुसन्धान केन्द्रहरूको समग्र कलात्मक प्रतिनिधित्वका रूपमा तयार गरिएको हो। यसको निर्माणका लागि सन् १९८० को दशकका अभिलेखीय तस्बिर, वृत्तचित्र, मोसफिल्मको पुस्तकालय सामग्री र तत्कालीन अन्टार्कटिक अभियानमा काम गरेका ध्रुवीय अनुसन्धानकर्मीको अनुभव अध्ययन गरिएको थियो।

चलचित्रका बाह्य दृश्य रुसको मुर्मान्स्क क्षेत्रस्थित तेरीबेरका आसपास छायाङ्कन गरिएको थियो। त्यहाँ छायाङ्कनका क्रममा तापक्रम माइनस ३९ डिग्री सेल्सियससम्म झरेको मोसफिल्मले जनाएको छ। निर्माण पक्षले अन्टार्कटिकाको कठिन वातावरणलाई पर्दामा बढी यथार्थपरक रूपमा देखाउन प्राकृतिक चिसोमै काम गरेको जनाएको छ।

मोसफिल्मका स्टुडियोभित्र सन् १९८० को दशकको अन्टार्कटिक अनुसन्धान केन्द्र झल्काउने विस्तृत सेट निर्माण गरिएको थियो। चलचित्रका लागि सोभियतकालीन विमान र प्रसिद्ध ‘खार्कोभचान्का’ ध्रुवीय ट्र्याक सवारीसाधनसमेत पुनःनिर्माण गरिएको छ। पुरानो प्रयोगको प्रभाव दिन सवारीसाधनको रंग र बाहिरी बनावटलाई समेत तत्कालीन समयअनुकूल बनाइएको थियो।

चलचित्रको पटकथा तथा निर्देशन अलेक्जान्दर जाचिन्याएभले गरेका हुन् भने मोसफिल्मका महानिर्देशक तथा प्रसिद्ध चलचित्र निर्देशक करेन शाखनजारोभ मुख्य निर्माता हुनुहुन्छ।

भिताली किशेन्को, अलेक्जान्दर गोर्बातोभ, अलेक्सेई भेर्तकोभ, युरी बेल्याएभ, दारिया उर्सुल्याक, किरिल ग्रेबेन्श्चिकोभ, इभान शाखनजारोभ, ओलेग भासिल्कोभ र माक्सिम कोस्त्रोमिकिनलगायत कलाकार चलचित्रमा छन्।

सङ्गीतकार युरी पोतेन्कोले चलचित्रका लागि ठूलो सिम्फोनिक सङ्गीत तयार गरिरहेका छन्, जसलाई प्रत्यक्ष अर्केस्ट्रामार्फत रेकर्ड गर्ने तयारी छ।

मोसफिल्मले चलचित्र सरकारी बजेट वा प्रायोजकको आर्थिक सहयोग नलिई आफ्नै लगानीमा निर्माण गरिरहेको जनाएको छ। पोस्ट–प्रोडक्सनका सम्पूर्ण काम पनि मोसफिल्मकै प्राविधिक संरचनामा भइरहेका छन्।

चलचित्रको सम्पूर्ण निर्माण कार्य सन् २०२६ डिसेम्बरसम्म पूरा गर्ने लक्ष्य राखिएको छ। ठूलो प्राकृतिक छायाङ्कन, ऐतिहासिक वातावरणको पुनःनिर्माण र मनोवैज्ञानिक कथावाचनलाई जोड्ने ‘Survive in the Ice’ यस वर्ष मोसफिल्मले अघि बढाएका प्रमुख मौलिक चलचित्र परियोजनामध्ये एक बनेको छ।