युक्रेनले गैररुसी तेल ट्यांकर र कजाख तेल पूर्वाधारमा हमला नगर्ने प्रतिबद्धता जनाएको अमेरिकी अधिकारीको दाबी
ड्रागन मिडिया समाचार कक्ष
युक्रेनले कालो समुन्द्र क्षेत्रमा रुससँग प्रत्यक्ष सम्बन्ध नरहेका तेल ट्यांकर तथा कजाखस्तानको तेल निर्यातका लागि आवश्यक पूर्वाधारलाई निशाना नबनाउने प्रतिबद्धता जनाएको एक अमेरिकी अधिकारीले बताएका छन्।
ब्लूमबर्गले अमेरिकी अधिकारीलाई उद्धृत गर्दै जनाएअनुसार अमेरिकी प्रशासनका प्रतिनिधिसँग भएको छलफलपछि युक्रेनी पक्षले यस्तो प्रतिबद्धता जनाएको हो।
यो विषय विशेषगरी कजाखस्तानको कच्चा तेल कालो समुन्द्रमार्फत अन्तर्राष्ट्रिय बजारमा पुर्याउने क्यास्पियन पाइपलाइन कन्सोर्टियम (CPC) सँग जोडिएको छ। उक्त पाइपलाइन कजाखस्तानबाट रुस हुँदै नोभोरोसिस्क नजिकको कालो समुन्द्र टर्मिनलसम्म पुग्छ र कजाख तेल निर्यातका लागि अत्यन्त महत्वपूर्ण मार्ग हो।
पछिल्ला सातामा कालो समुन्द्र क्षेत्रमा ट्यांकर, बन्दरगाह तथा ऊर्जा पूर्वाधारमाथि भएका आक्रमणले CPC मार्फत हुने तेल ढुवानी प्रभावित भएको छ। यसका कारण जहाज सञ्चालन, तेल लोडिङ तथा कजाखस्तानको उत्पादनसमेत दबाबमा परेको विवरण सार्वजनिक भएका छन्।
अमेरिकी ऊर्जा कम्पनी Chevron र ExxonMobil लगायत पश्चिमी कम्पनीको पनि कजाखस्तानको तेल उत्पादन तथा CPC संरचनामा महत्वपूर्ण व्यावसायिक हिस्सा रहेको छ। त्यसैले गैररुसी जहाज तथा कजाख तेल पूर्वाधारको सुरक्षालाई वाशिङ्टनले ऊर्जा आपूर्ति र आफ्ना व्यावसायिक हितसँग समेत जोडेर हेर्दै आएको छ।
यसअघि अमेरिकी प्रशासनले युक्रेनलाई कालो समुन्द्रमा गैररुसी जहाजलाई निशाना नबनाउन आग्रह गरेको विवरण अमेरिकी सञ्चारमाध्यममा सार्वजनिक भएको थियो।
पछिल्लो प्रतिबद्धता कार्यान्वयन भएमा कालो समुन्द्र हुँदै कजाख तेल निर्यातमा देखिएको अनिश्चितता केही कम हुन सक्ने अपेक्षा गरिएको छ। यद्यपि युक्रेनी पक्षबाट यसबारे विस्तृत आधिकारिक वक्तव्य सार्वजनिक भएको जानकारी प्राप्त भएको छैन।
कजाखस्तान स्थलरुद्ध मुलुक भएकाले आफ्नो ठूलो हिस्सा कच्चा तेल निर्यातका लागि CPC मार्गमा निर्भर छ। त्यसैले कालो समुन्द्र क्षेत्रमा बढेको सैन्य जोखिमले रुस–युक्रेन द्वन्द्वसँग प्रत्यक्ष सम्बन्ध नरहेका क्षेत्रीय तथा अन्तर्राष्ट्रिय ऊर्जा हितमा समेत प्रभाव पार्दै आएको छ।
