चीनको ५३ अफ्रिकी देशलाई शून्य भन्सार नीति, साझा विकास र औद्योगिकीकरणमा नयाँ अवसर
ड्रागन मिडिया समाचार कक्ष
चीनले कूटनीतिक सम्बन्ध भएका ५३ अफ्रिकी देशका वस्तुलाई प्रदान गरेको शून्य भन्सार सुविधाले केवल व्यापारिक लाभ मात्र नभई साझा विकास, समावेशी आर्थिक विश्वव्यापीकरण तथा पारस्परिक सम्मान, समानता र साझा हितमा आधारित सहकार्यप्रति चीनको दीर्घकालीन प्रतिबद्धता देखाएको नाइजरका एक विज्ञले बताएका छन्।
नाइजर उद्योग तथा वाणिज्य सदनका विज्ञ अमादु मागागीले सिन्ह्वासँग कुरा गर्दै चीनको यो नीतिले चीन–अफ्रिका सहयोग मञ्चअन्तर्गत अफ्रिकाको औद्योगिकीकरणलाई सहयोग गर्ने, विश्व मूल्य श्रृंखलामा अफ्रिकी देशको सहभागिता बढाउने र अफ्रिकी व्यवसायका लागि थप अवसर सिर्जना गर्ने प्रतिबद्धतालाई व्यवहारमा उतारेको बताए।
उनका अनुसार यो नीति साझा भविष्यसहितको चीन–अफ्रिका समुदाय निर्माणतर्फको ठोस कदम हो, जहाँ एक पक्षको समृद्धिले अर्को पक्षको विकासलाई पनि गति दिन सक्छ।
मागागीले यस नीतिले चीन र अफ्रिकाबीच पारस्परिक विश्वास बलियो बनाउनुका साथै आर्थिक सम्बन्धको नयाँ अध्याय खोल्ने बताए।
चिनियाँ बजारमा अफ्रिकी व्यवसायको चासो बढ्दै
शून्य भन्सार सुविधाले चिनियाँ बजारप्रति अफ्रिकी व्यवसायको चासो बढाएको र चीन–अफ्रिका आर्थिक सहकार्यप्रति लगानीकर्ताको विश्वास पनि सुदृढ बनाएको मागागीले बताए।
उनका अनुसार आधुनिक कृषि, कृषि प्रशोधन, प्रशोधित खाद्य वस्तु, पशुपालन, कपडा तथा तयारी पोषाक, वनजन्य वस्तु, प्रशोधित प्राकृतिक श्रोत तथा उच्च मूल्य अभिवृद्धि हुने हलुका उत्पादन क्षेत्रले यस नीतिबाट सबैभन्दा बढी लाभ लिन सक्नेछन्।
मध्यम तथा दीर्घकालीन अवधिमा यो नीतिले अफ्रिकी निर्यातको गुणस्तर र संरचना सुधार गर्न तथा चिनियाँ बजारको माग पूरा गर्न सक्ने क्षेत्रीय मूल्य श्रृंखला विकास गर्न सहयोग पुर्याउने अपेक्षा गरिएको छ।
नाइजरका लागि ‘असाधारण रणनीतिक अवसर’
मागागीले चीनको शून्य भन्सार नीतिलाई नाइजरका लागि ‘असाधारण रणनीतिक अवसर’का रूपमा व्याख्या गरेका छन्।
उनका अनुसार नाइजरसँग प्रशस्त कृषि, पशुपालन र खनिज श्रोत रहेका छन्। तिल, बदाम, बोडी, गम अरबिक, टाइगर नट्स, पशुजन्य वस्तु तथा अन्य उच्च मूल्य अभिवृद्धि गर्न सकिने उत्पादनमा पनि देशसँग उल्लेखनीय सम्भावना रहेको छ।
विशाल चिनियाँ बजारमा प्राथमिकतासहित पहुँच पाउँदा नाइजरको निर्यात बढाउन, कच्चा पदार्थलाई देशभित्रै प्रशोधन गर्न र रोजगारी सिर्जना गर्न सहयोग पुग्ने उनले बताए।
संरक्षणवादबीच खुला व्यापारको सन्देश
विश्वका विभिन्न क्षेत्रमा व्यापारिक तनाव, भूराजनीतिक अनिश्चितता र संरक्षणवाद पुनः बढिरहेका बेला चीनको यो नीतिले खुला व्यापार, आर्थिक खुलापन, बहुपक्षीय सहकार्य र साझा विकासप्रतिको प्रतिबद्धता पुनः पुष्टि गरेको मागागीको भनाइ छ।
उनले चीन–अफ्रिका आर्थिक तथा व्यापारिक सहकार्यको भविष्यलाई अत्यन्त आशाजनक बताएका छन्।
उनका अनुसार शून्य भन्सार नीति उत्पादनमूलक लगानी, औद्योगिक रूपान्तरण, पूर्वाधार विकास, नवप्रवर्तन, अङ्कीय रूपान्तरण र क्षमता विकासलाई बढी प्राथमिकता दिने आर्थिक सहकार्यको नयाँ चरणतर्फको महत्वपूर्ण कदम हो।
उत्पादन र प्रशोधन क्षमता बढाउनुपर्ने
मागागीले अफ्रिकी देशले यस नीतिबाट अधिकतम लाभ लिन आफ्नै उत्पादन तथा औद्योगिक प्रशोधन क्षमता सुदृढ बनाउनुपर्ने बताएका छन्।
चिनियाँ बजारका आवश्यकता पूरा गर्न वस्तुको गुणस्तर, मापदण्ड र प्रमाणिकरण सुधार गर्नुपर्ने तथा ढुवानी पूर्वाधार, बन्दरगाह र व्यापारिक मार्ग विकास गर्नुपर्ने उनको सुझाव छ।
उनले भन्सार प्रक्रिया थप सहज बनाउन, चीन र अफ्रिकी उद्यमबीच औद्योगिक लगानी र सहकार्य विस्तार गर्न तथा शीप विकास, नवप्रवर्तन, अङ्कीय अर्थतन्त्र र व्यावसायिक प्रशिक्षणका क्षेत्रमा सहकार्य गहिरो बनाउनुपर्ने आवश्यकता औँल्याए।
चीनको ५३ अफ्रिकी देशका लागि शून्य भन्सार नीति अफ्रिकी वस्तुलाई विशाल चिनियाँ बजारमा थप प्रतिस्पर्धी बनाउने मात्र होइन, उत्पादन, प्रशोधन, रोजगारी र औद्योगिक विकासलाई पनि गति दिन सक्ने महत्वपूर्ण आर्थिक अवसरका रूपमा हेरिएको छ।
