रास्वपाभित्र मतभेद सार्वजनिक हुँदै, सांसद राजु पाण्डेको टिप्पणीले बढायो चासो

ड्रागन मिडिया सम्वाददाता

सत्तारुढ राष्ट्रिय स्वतन्त्र पार्टीभित्र सरकार र पार्टी नेतृत्वबीचको सम्बन्धबारे सार्वजनिक बहस बढिरहेका बेला सांसद राजु पाण्डेले सामाजिक सञ्जालमा गरेको संक्षिप्त टिप्पणीले राजनीतिक वृत्तमा चासो बढाएको छ।

प्रधानमन्त्री वालेन्द्र शाहले शनिबार राति सामाजिक सञ्जालमार्फत कहिलेकाहीँ एक्लै लड्नुपर्ने अवस्था आउने आशयसहित अभिव्यक्ति दिएपछि रास्वपाभित्र सरकारको कार्यशैली र पार्टीसँगको समन्वयबारे चलिरहेको असन्तुष्टि थप सार्वजनिक भएको हो।

प्रधानमन्त्रीको अभिव्यक्तिलगत्तै रास्वपा सांसद मनिष झालगायत नेताहरूले सामाजिक सञ्जालमार्फत कोही एक्लो नरहेको र सरकारलाई सफल बनाउन पार्टी तथा निर्वाचित प्रतिनिधिहरू साथमा रहेको सन्देश दिएका थिए।

पार्टी सभापति रवि लामिछानेसहित शीर्ष नेताहरूले पनि पछिल्ला सार्वजनिक कार्यक्रममा सरकारको कामकारवाहीबारे प्रश्न उठाउँदै आवश्यक परे पार्टीले सरकारलाई सचेत गराउने बताएका छन्। यसले प्रधानमन्त्री र पार्टी नेतृत्वबीच कार्यशैली, राजनीतिक समन्वय तथा सरकारमाथि पार्टीको भूमिकाबारे मतभिन्नता रहेको संकेत गरेको छ।

यही पृष्ठभूमिमा सांसद पाण्डेले फेसबुकमा, “नाङ्गै जन्मेको थिएँ, नाङ्गै जल्ने छु,” भन्ने टिप्पणी सार्वजनिक गरेका छन्।

पाण्डेले उक्त अभिव्यक्तिको राजनीतिक आशय वा त्यसले लक्षित गरेको विषयबारे थप स्पष्टीकरण दिएका छैनन्। त्यसैले उनको टिप्पणीलाई प्रधानमन्त्री शाह वा पार्टी नेतृत्वबीचको पछिल्लो विवादसँग प्रत्यक्ष जोडेर निष्कर्ष निकाल्ने आधार तत्काल स्पष्ट छैन।

तर सरकार र सत्तारुढ पार्टीभित्रका नेताहरूले एकअर्काप्रति सार्वजनिक रूपमा फरक धारणा व्यक्त गरिरहेको समयमा आएको उक्त टिप्पणीलाई राजनीतिक वृत्तमा स्वाभाविक रूपमा चासोका साथ हेरिएको छ।

पछिल्ला दिनमा रास्वपाका सांसदहरूले संसदमा सरकारको कार्यशैली, सेवा प्रवाह तथा जनजीविकाका विषयमा प्रश्न उठाउँदै आएका छन्। पार्टी नेतृत्वले पनि सरकार पार्टीको राजनीतिक प्रतिबद्धता र जनादेशप्रति उत्तरदायी रहनुपर्ने धारणा सार्वजनिक रूपमा राख्दै आएको छ।

प्रधानमन्त्री शाहले भने सामाजिक सञ्जालमार्फत परिस्थितिको वास्तविकता बाहिर देखिएभन्दा फरक हुन सक्ने र सही परिणामका लागि समय लाग्ने सन्देश दिँदै आएका छन्।

यसरी प्रधानमन्त्री, पार्टी नेतृत्व र सांसदहरूबाट एकपछि अर्को सार्वजनिक अभिव्यक्ति आउन थालेपछि रास्वपाभित्रको आन्तरिक बहस अब बन्द बैठकमा सीमित नरही सार्वजनिक राजनीतिक संवादको विषय बन्न थालेको देखिएको छ।