चीनमा टाइफुन ‘डल्फिन’को उच्च जोखिम, पूर्वी तटीय क्षेत्रमा रेड अलर्ट
ड्रागन मिडिया समाचार कक्ष
चीनको पूर्वी तटीय क्षेत्रतर्फ शक्तिशाली टाइफुन ‘डल्फिन’ नजिकिँदै गएपछि राष्ट्रिय मौसम केन्द्रले आइतबार टाइफुनसम्बन्धी उच्चतम तहको रेड अलर्ट सक्रिय गरेको छ। झेजियाङ र फुजियानका तटीय क्षेत्रलाई मुख्य जोखिम क्षेत्रमा राखिएको छ भने शाङहाईसहित विभिन्न भागमा अत्यधिक वर्षा र शक्तिशाली हावाको सम्भावना रहेको छ।
चीनको राष्ट्रिय मौसम केन्द्रका अनुसार आइतबार बिहान १० बजेसम्म टाइफुनको केन्द्र झेजियाङ प्रान्तको वेन्झोउबाट करिब २१५ किलोमिटर पूर्वी समुद्री क्षेत्रमा थियो। केन्द्र आसपास अधिकतम हावाको गति प्रतिसेकेन्ड ४५ मिटर, अर्थात करिब १६२ किलोमिटर प्रतिघण्टा पुगेको थियो।
मौसम पूर्वानुमानअनुसार डल्फिन प्रतिघण्टा २० देखि २५ किलोमिटरको गतिमा पश्चिमतर्फ अघि बढिरहेको छ। टाइफुन झेजियाङको झोउसानदेखि फुजियानको फुदिङबीचको तटीय क्षेत्रमा जमिन प्रवेश गर्ने अनुमान गरिएको छ।
जमिनमा प्रवेश गरेपछि टाइफुन पश्चिम उत्तरपश्चिम दिशातर्फ अघि बढ्दै क्रमशः कमजोर हुने राष्ट्रिय मौसम केन्द्रले जनाएको छ।
डल्फिनको प्रभाव तटीय क्षेत्रमा मात्र सीमित नहुने अनुमान गरिएको छ। आइतबारदेखि बुधबारसम्म फुजियान, झेजियाङ र शाङहाईका साथै शानदोङ, थ्येनचिन र बेइजिङका विभिन्न क्षेत्रमा भारीदेखि अत्यधिक वर्षा हुन सक्ने चेतावनी दिइएको छ।
प्रभावित क्षेत्रमा छोटो अवधिमै ठूलो वर्षा, चट्याङ र तीव्र हावासहितका मौसमी गतिविधि हुन सक्ने अधिकारीहरूले बताएका छन्। लगातार तथा अत्यधिक वर्षाका कारण केही क्षेत्रमा बाढी, पहिरो र अन्य मौसमजन्य विपदको जोखिम पनि बढ्न सक्ने देखिएको छ।
बढ्दो जोखिमलाई ध्यानमा राख्दै चीनको मौसमसम्बन्धी निकायले गम्भीर मौसमजन्य विपदका लागि लागू गरिएको आपतकालीन प्रतिकार्य तह तेस्रोबाट दोस्रो तहमा स्तरोन्नति गरेको छ।
सम्बन्धित तटीय प्रान्त तथा शहरहरूलाई टाइफुनको सम्भावित प्रभावका लागि पूर्वतयारी तीव्र बनाउन, समुद्री तथा स्थल यातायातमा जोखिम न्यूनीकरण गर्न र भारी वर्षाबाट उत्पन्न हुन सक्ने विपदप्रति उच्च सतर्कता अपनाउन निर्देशन दिइएको छ।
टाइफुनको वास्तविक प्रभाव भने यसको जमिन प्रवेश गर्ने स्थान, गति र त्यसपछि हुने वर्षाको वितरणमा निर्भर रहनेछ। मौसम अधिकारीहरूले प्रभावित क्षेत्रका नागरिकलाई पछिल्ला आधिकारिक पूर्वानुमान र स्थानीय सुरक्षा निर्देशनलाई निरन्तर पालना गर्न आग्रह गरेका छन्।
