गान्जीमा १६ देशका वस्तुको प्रदर्शनी, एकैदिन पाँच लाख युआनभन्दा बढी कारोबार
ड्रागन मिडिया समाचार कक्ष
चीनको सिचुआन प्रान्तअन्तर्गत गान्जी काउन्टीमा १६ देशका वस्तु समेटिएको अन्तर्राष्ट्रिय प्रदर्शनी तथा व्यापार सप्ताह आयोजना गरिएको छ। ‘सिल्क रोड गान्जी’ अवधारणाअन्तर्गत आयोजित कार्यक्रममा विभिन्न देशका विशिष्ट उत्पादन, हस्तकला, पुरातात्विक तथा सांस्कृतिक सामग्री र बहुमूल्य गहनाका प्रदर्शनी एकसाथ सञ्चालन गरिएको हो।
कार्यक्रमअन्तर्गत १६ देशका वस्तुको प्रदर्शनी, पुराना तथा सङ्ग्रहणीय वस्तुको व्यापार प्रदर्शनी र मोतीलगायत बहुमूल्य गहनाको प्रदर्शनी गरी तीन प्रमुख कार्यक्रम गेसार सांस्कृतिक क्षेत्रमा एकैपटक आयोजना गरिएको थियो। प्रदर्शनीले स्थानीय बासिन्दा तथा ठूलो सङ्ख्यामा पर्यटकको ध्यान आकर्षित गरेको आयोजकले जनाएको छ।
प्रदर्शनीमा नेपालका हस्तनिर्मित थाङ्का, भारतका सुगन्धित धूप, गान्जीका स्थानीय हस्तकला तथा तामाका सामग्रीसहित विभिन्न देशका जातीय गहना, सांस्कृतिक सिर्जना र विशेष उत्पादन राखिएका थिए।
आयोजकका अनुसार १६ देशका व्यापारी तथा पुरातात्विक वस्तु, खाद्य सामग्री, मोती, गहना र सांस्कृतिक सिर्जनासँग सम्बन्धित ३०० भन्दा बढी व्यवसायी तथा प्रदर्शक गान्जीमा सहभागी भएका छन्। प्रदर्शनीमार्फत एकैदिन प्रत्यक्ष बिक्री र अर्डर गरी पाँच लाख युआनभन्दा बढीको कारोबार भएको जनाइएको छ।
अन्तर्राष्ट्रिय व्यापारसँगै स्थानीय संस्कृतिको प्रवर्द्धनलाई पनि कार्यक्रमको प्रमुख उद्देश्य बनाइएको छ। आगामी कार्यक्रमअन्तर्गत स्थानीय अमूर्त सांस्कृतिक सम्पदासँग सम्बन्धित परम्परागत नृत्य तथा सांस्कृतिक प्रस्तुति प्रदर्शन गरिनेछ।
कार्यतालिकाअनुसार अगस्ट ७ मा घोडचढीसम्बन्धी कार्यक्रम आयोजना गरिनेछ भने अगस्ट ९ मा सन् २०२६ को चीन राष्ट्रिय फिटनेस ट्रेल रन प्रतियोगिताको सिचुआन–गान्जी चरण तथा देशका विभिन्न शहरलाई जोड्ने दौड कार्यक्रम आयोजना हुने तय भएको छ।
आयोजकले व्यापार प्रदर्शनी, जातीय संस्कृति, पर्यटन र खेलकुदलाई एकसाथ जोडेर गान्जीको स्थानीय अर्थतन्त्र, सांस्कृतिक पहिचान र पर्यटन प्रवर्द्धनलाई थप विस्तार गर्ने लक्ष्य राखेको जनाएको छ।
