बेइजिङबाट बुखारेस्ट हुँदै जाग्रेबसम्म एयर चाइनाको नयाँ उडान
ड्रागन मिडिया समाचार कक्ष
चिनियाँ ध्वजावाहक वायुसेवा कम्पनी एयर चाइनाले बेइजिङलाई रोमानियाको राजधानी बुखारेस्ट र क्रोएसियाको प्रमुख शहर जाग्रेबसँग जोड्ने नयाँ हवाई सेवा आगामी सेप्टेम्बर ४ देखि शुरु गर्ने भएको छ।
कम्पनीका अनुसार नयाँ सेवा बेइजिङ क्यापिटल अन्तर्राष्ट्रिय विमानस्थलबाट बुखारेस्ट हुँदै जाग्रेबसम्म सञ्चालन हुनेछ। यो मार्गमा प्रत्येक सोमबार, बुधबार र शुक्रबार नियमित उडान हुनेछन्।
एयर चाइनाले युरोपमा आफ्नो उडान सञ्जाल विस्तार र क्षमता वृद्धि गर्ने रणनीतिअन्तर्गत नयाँ मार्ग सञ्चालन गर्न लागेको जनाएको छ। कम्पनीले गत जुलाईमा बेइजिङ र इटालीको भेनिसबीच सीधा उडान सेवा शुरु गरेको थियो।
नयाँ मार्ग थपिएसँगै एयर चाइनाको मध्य तथा दक्षिणपूर्वी युरोपसँगको हवाई सम्पर्क अझ विस्तार हुने अपेक्षा गरिएको छ। विशेषगरी रोमानिया र क्रोएसियासँग चीनको पर्यटन, व्यापार तथा जनस्तरीय आवागमन सहज बनाउन नयाँ सेवाले योगदान पुर्याउने देखिएको छ।
एयर चाइनाले हाल युरोपका २७ गन्तव्यमा सेवा सञ्चालन गर्दै आएको छ। कम्पनीले युरोपेली मार्गमा सातामा करिब २६० उडान सञ्चालन गरिरहेको जनाएको छ।
