धनगढीमा धानखेतीका लागि डिएपी मलको आपूर्ति कमजोर, आवश्यकताको १७ प्रतिशत मात्रै उपलब्ध
ड्रागन मिडिया सम्वाददाता
धनगढीस्थित कृषि सामग्री कम्पनी लिमिटेडले चालु आर्थिक वर्षको साउन १ देखि २६ गतेसम्म एक हजार २८७.७ मेट्रिक टन युरिया र २९५.७ मेट्रिक टन डिएपी मल बिक्री गरेको छ।
यस अवधिमा ३३.२५ मेट्रिक टन पोटाससमेत बिक्री भएको कम्पनीले जनाएको छ। प्रादेशिक कार्यालयका प्रबन्धक नवलसिंह बोगटीका अनुसार धानखेतीका लागि आवश्यक रासायनिक मल किसानसम्म पुर्याउने क्रममा सहकारी तथा कृषि सामग्री बिक्री केन्द्रमार्फत मल वितरण भइरहेको छ।
धानखेतीको मुख्य समयमा मलको माग उच्च हुने गरे पनि उपलब्ध आपूर्ति आवश्यकताअनुसार पर्याप्त छैन। धनगढीका लागि युरियाको आवश्यक कोटा एक हजार ९४७.७०५ मेट्रिक टन र डिएपीको एक हजार ९१५.८१५ मेट्रिक टन रहेको बोगटीले जानकारी दिए।
हाल कम्पनीसँग ११०.२५० मेट्रिक टन युरिया, ३१ मेट्रिक टन डिएपी र ९३.६५० मेट्रिक टन पोटास मौज्दात छ।
कम्पनीको विवरणअनुसार मंगलबारसम्म बिक्री भइसकेको र मौज्दातमा रहेको परिमाण जोड्दा युरिया एक हजार ३९७.९५५ मेट्रिक टन र डिएपी ३२६.७ मेट्रिक टन पुगेको छ।
आवश्यक कोटासँग तुलना गर्दा युरियाको उपलब्धता करिब ७२ प्रतिशत पुगेको छ भने डिएपीको उपलब्धता करिब १७ प्रतिशतमा सीमित छ। यसले विशेषगरी डिएपीको आपूर्तिमा ठूलो अन्तर रहेको देखाएको छ।
कम्पनीका अनुसार आवश्यक कोटाको तुलनामा युरिया ५४९.७५५ मेट्रिक टन र डिएपी एक हजार ५८९.११५ मेट्रिक टन अपुग छ।
धानखेतीका लागि रासायनिक मलको माग उच्च हुने समयमा डिएपीको आपूर्ति अत्यन्त कम हुँदा किसानले आवश्यक परिमाणमा मल पाउन कठिनाइ भोगिरहेका छन्। उपलब्ध आपूर्ति बढाउन नसके धानखेतीको मुख्य समयमा मल अभाव थप चर्किन सक्ने देखिएको छ।
