घरेलु माग र प्रविधि क्षेत्रमा वित्तीय सहयोग बढाउने चीनको केन्द्रीय बैंकको घोषणा

ड्रागन मिडिया समाचार कक्ष

चीनको केन्द्रीय बैंकले घरेलु माग विस्तार, प्राविधिक नवप्रवर्तन तथा साना र लघु उद्यमलाई सहयोग गर्न वित्तीय समर्थन थप सुदृढ गर्ने जनाएको छ।

पीपुल्स बैंक अफ चाइनाले सार्वजनिक गरेको सन् २०२६ को दोस्रो त्रैमासिक मौद्रिक नीति प्रतिवेदनअनुसार वर्षको सुरुदेखि नै उपयुक्त रूपमा उदार मौद्रिक नीति कार्यान्वयन गर्दै उच्च गुणस्तरीय आर्थिक विकासका लागि अनुकूल मौद्रिक तथा वित्तीय वातावरण निर्माण गरिएको छ।

केन्द्रीय बैंकले संरचनात्मक मौद्रिक नीति उपकरणलाई निरन्तर सुधार गर्दै वित्तीय स्रोतको प्रवाहलाई प्राथमिकता प्राप्त क्षेत्रतर्फ केन्द्रित गरेको जनाएको छ।

जुन महिनाको अन्त्यसम्म प्रविधि, हरित अर्थतन्त्र, समावेशी वित्त, वृद्धवृद्धा हेरचाह तथा डिजिटल अर्थतन्त्रसँग सम्बन्धित क्षेत्रमा प्रवाह भएको ऋणको वृद्धिदर कुल ऋण वृद्धिदरभन्दा उच्च रहेको प्रतिवेदनमा उल्लेख छ।

विदेशी मुद्रा बजारमा माग र आपूर्ति समग्र रूपमा सन्तुलित रहेको तथा चिनियाँ मुद्रा रेन्मिन्पीको विनिमय दर उचित र सन्तुलित स्तरमा मूलतः स्थिर रहेको केन्द्रीय बैंकले जनाएको छ।

आगामी अवधिमा घरेलु तथा अन्तर्राष्ट्रिय आर्थिक र वित्तीय अवस्था तथा वित्तीय बजारको सञ्चालनलाई ध्यानमा राख्दै मौद्रिक नीतिको तीव्रता, गति र कार्यान्वयनको समय उपयुक्त रूपमा समायोजन गरिने बैंकले जनाएको छ।

पीपुल्स बैंक अफ चाइनाले घरेलु माग विस्तार, वैज्ञानिक तथा प्राविधिक नवप्रवर्तनलाई प्रवर्द्धन र साना तथा लघु उद्यमको वित्तीय पहुँच विस्तारलाई प्रमुख प्राथमिकतामा राख्ने जनाएको छ।

केन्द्रीय बैंकले विनिमय दर अत्यधिक उतारचढाव हुने जोखिम नियन्त्रण गर्ने, वित्तीय बजारको स्थिर सञ्चालन कायम राख्ने र प्रणालीगत वित्तीय जोखिम उत्पन्न हुन नदिने नीति पनि निरन्तर अघि बढाउने स्पष्ट गरेको छ।