कुरिल द्वीप रुसकै भूमि थियो, छ र रहनेछ : मेदभेदेभ
ड्रागन मिडिया समाचार कक्ष
रुसी सुरक्षा परिषदका उपाध्यक्ष तथा पूर्वराष्ट्रपति दिमित्री मेदभेदेभले कुरिल द्वीपसमूह रुसकै भूमि रहेको र भविष्यमा पनि रुसकै रहने बताएका छन्।
राष्ट्रपति भ्लादिमिर पुटिनले बिहीबार पहिलोपटक कुरिल द्वीपसमूहको इटुरुप टापु भ्रमण गरेपछि जापानले जनाएको कडा विरोधको जवाफमा मेदभेदेभले यस्तो टिप्पणी गरेका हुन्।
“कुरिल द्वीप रुसको भूमि थियो, छ र रहनेछ,” मेदभेदेभले भनेका छन्।
उनले कुरिल द्वीपमाथिको रुसी सार्वभौमिकता स्थायी रहेको भन्दै यसलाई स्वीकार नगर्ने जोसुकैले गम्भीर परिणाम सामना गर्नुपर्ने चेतावनीसमेत दिएका छन्। जापानी प्रधानमन्त्री सानाए ताकाइचीलाई प्रत्यक्ष उल्लेख गर्दै उनले कुरिलको रुससँगको स्थायी सम्बन्ध नबुझ्नेहरूले “भयानक परिणाम” सामना गर्नुपर्ने टिप्पणी गरे।
मेदभेदेभको उक्त अभिव्यक्तिमा ‘परिणाम’ को प्रकृति स्पष्ट गरिएको छैन। त्यसैले यसलाई प्रत्यक्ष सैन्य कारवाहीको घोषणा नभई जापानको क्षेत्रीय दाबीप्रति मस्कोको अत्यन्त कडा राजनीतिक प्रतिक्रिया र चेतावनीका रूपमा हेरिएको छ।
पुटिन बिहीबार इटुरुप पुगेपछि जापानी प्रधानमन्त्री ताकाइचीले भ्रमणलाई “पूर्ण रूपमा अस्वीकार्य” भन्दै विरोध जनाएकी थिइन्। उनले पुटिनको भ्रमणले जापानी जनताको भावनामा चोट पुर्याएको र रुससँग सम्बन्ध सुधार गर्ने प्रयासलाई कठिन बनाएको बताएकी छन्।
मस्कोले भने कुरिल द्वीपसमूहको हैसियत दोस्रो विश्वयुद्धको परिणामबाट निर्धारित भइसकेको र त्यसमाथिको रुसी सार्वभौमिकता पुनर्विचारको विषय नभएको बताउँदै आएको छ।
जापानले दक्षिणी कुरिलका इटुरुप, कुनाशिर, शिकोटान र हाबोमाई टापु समूहलाई आफ्नो ‘उत्तरी भूभाग’ भन्दै दाबी गर्दै आएको छ। यी क्षेत्रमा दोस्रो विश्वयुद्धको अन्तिम चरणदेखि सोभियत संघको नियन्त्रण कायम भएको थियो र अहिले ती रुसी संघअन्तर्गत सखालिन क्षेत्रको प्रशासनमा छन्।
यसै विवादका कारण रुस र जापानबीच दोस्रो विश्वयुद्धपछि औपचारिक शान्ति सन्धि हुन सकेको छैन।
मेदभेदेभ स्वयं सन् २०१० मा राष्ट्रपति रहँदा दक्षिणी कुरिल भ्रमण गर्ने पहिलो रुसी राष्ट्रप्रमुख बनेका थिए। त्यसयता उनले पटकपटक कुरिलको क्षेत्रीय हैसियतबारे मस्कोको अडान परिवर्तन नहुने बताउँदै आएका छन्।
पुटिनको पछिल्लो भ्रमण र त्यसपछि मस्को तथा टोकियोबाट आएका कडा अभिव्यक्तिले लामो समयदेखि कायम कुरिल विवाद फेरि दुई देशबीचको प्रमुख कूटनीतिक तनावको विषय बनेको छ।
