चुनदेवीमा सभापतिकै हैसियतमा देउवाको कार्यकक्ष, गगन थापालाई अस्वीकार गर्दै अघि बढ्यो समूह

ड्रागन मिडिया सम्वाददाता

नेपाली कांग्रेसका पूर्वसभापति शेरबहादुर देउवानिकट समूहले पार्टीको आधिकारिक नेतृत्वसम्बन्धी विवादबीच देउवालाई नै सभापतिको हैसियतमा प्रस्तुत गर्दै काठमाडौंको चुनदेवीस्थित सम्पर्क कार्यालयमा छुट्टै कार्यकक्ष स्थापना गरेको छ।

करिब साढे पाँच महिनाको विदेश बसाइपछि बिहीबार स्वदेश फर्किएका देउवा त्रिभुवन अन्तर्राष्ट्रिय विमानस्थलबाट सोझै चुनदेवीस्थित सम्पर्क कार्यालय पुगेका थिए। त्यहाँ देउवानिकट नेता तथा कार्यकर्ताले उनलाई स्वागत गरेका थिए।

सम्पर्क कार्यालयमा देउवाका लागि ‘सभापति’ उल्लेख गरिएको छुट्टै कार्यकक्ष तयार गरिएको छ भने ढोकामा उनको नामसहितको नेमप्लेटसमेत राखिएको छ। कार्यालय परिसरमा पनि देउवालाई पार्टी सभापतिकै रूपमा प्रस्तुत गरिएको छ।

यससँगै देउवा समूहले विशेष महाधिवेशनबाट नेतृत्वमा आएका गगनकुमार थापालाई सभापतिका रूपमा स्वीकार नगर्ने राजनीतिक सन्देश थप स्पष्ट पारेको छ।

पार्टीको आधिकारिकतासम्बन्धी विवादमा सर्वोच्च अदालतले यसअघि निर्वाचन आयोगले मान्यता दिएको गगन थापा नेतृत्वसम्बन्धी फैसला पुनरावलोकन गर्न अनुमति दिएपछि देउवा पक्ष थप सक्रिय बनेको हो। यद्यपि पुनरावलोकनको अनुमति आफैँमा यसअघिको फैसला स्थगित भएको अवस्था भने होइन।

देउवा समूहका नेता डा. शशांक कोइरालाले बिहीबार विमानस्थलमै देउवा अझै पनि नेपाली कांग्रेसको वैधानिक सभापति रहेको दाबी गरेका थिए। उनले पार्टीलाई पुनः एकताबद्ध बनाउने प्रयास जारी रहने बताएका छन्।

देउवा समूहले शुक्रबार राष्ट्रिय भेला आयोजना गर्दैछ। नेता प्रकाशशरण महतका अनुसार भेलाको उद्घाटन देउवाले गर्ने कार्यक्रम छ। उक्त भेलालाई समूहले पछिल्लो राजनीतिक तथा संगठनात्मक विवादपछि आफ्नो शक्ति र भावी रणनीति स्पष्ट गर्ने महत्वपूर्ण कार्यक्रमका रूपमा अघि बढाएको छ।

स्वदेश फर्किएलगत्तै देउवाले जारी गरेको सार्वजनिक अपिलमा भने पार्टीभित्रको असहमति र निराशा तत्काल समाधान गर्नुपर्ने तथा सबै पक्षलाई एकताबद्ध बनाउँदै अघि बढ्नुपर्नेमा जोड दिएका छन्। उनले आफू शक्ति प्राप्त गर्न नभई राष्ट्रिय एकता सुदृढ गर्न स्वदेश फर्किएको बताएका छन्।

एकातिर देउवाले पार्टी एकताको आह्वान गरेका छन् भने अर्कोतर्फ उनको समूहले चुनदेवीमा सभापतिकै हैसियतमा कार्यकक्ष स्थापना गरेर समानान्तर राजनीतिक तथा संगठनात्मक गतिविधि अघि बढाएको छ।

यसले नेपाली कांग्रेसभित्र नेतृत्वको आधिकारिकता र आन्तरिक एकताको प्रश्न अझै समाधान नभएको संकेत गरेको छ। सर्वोच्च अदालतमा जारी पुनरावलोकन प्रक्रियाको अन्तिम परिणामले पार्टीको कानुनी आधिकारिकतासम्बन्धी विवादमा निर्णायक प्रभाव पार्ने देखिएको छ।