ल्हासामा सिचाङ संस्कृति तथा पर्यटन ‘तीन प्रवेश’ कार्यक्रम, युवा र व्यवसायलाई जोड्दै पर्यटन प्रवर्द्धन

ड्रागन मिडिया समाचार कक्ष

चीनको सिचाङ स्वायत्त क्षेत्रको राजधानी ल्हासामा संस्कृति तथा पर्यटनलाई विश्वविद्यालय, व्यवसाय र समुदायसँग प्रत्यक्ष जोड्ने उद्देश्यले सन् २०२६ को सिचाङ संस्कृति तथा पर्यटन ‘क्याम्पसमा प्रवेश, व्यवसायमा प्रवेश र समुदायमा प्रवेश’ अर्थात ‘तीन प्रवेश’ कार्यक्रमअन्तर्गत विशेष लिङ्का अनुभव तथा साझेदारी कार्यक्रम आयोजना गरिएको छ।

अगस्ट ७ मा आयोजित कार्यक्रममा ‘सिचाङ भ्रमण’ तथा सिचाङसम्बन्धी तस्बिर सङ्कलन अभियानलाई पनि जोडिएको थियो। सिचाङको परम्परागत लिङ्का अर्थात खुला प्राकृतिक परिवेशमा सामूहिक मनोरञ्जन र सांस्कृतिक भेटघाट गर्ने अभ्यासलाई कार्यक्रमको मुख्य माध्यम बनाइएको थियो।

कार्यक्रमस्थलमा सिचाङका पशुपालक क्षेत्रको जीवनशैली झल्काउने परम्परागत कालो पालसहितको विशेष बजार, परम्परागत खेल तथा लोकहस्तकला अनुभव क्षेत्र निर्माण गरिएको थियो। सहभागीले स्थानीय हस्तकला, सांस्कृतिक सिर्जना र परम्परागत जीवनशैलीलाई नजिकबाट अनुभव गर्ने अवसर पाएका थिए।

कार्यक्रममा चीनका विभिन्न विश्वविद्यालयका युवा प्रतिनिधि, उद्यमी, स्थानीय सांस्कृतिक तथा सिर्जनात्मक उद्योगका प्रतिनिधि र अन्य सहभागीले आफ्ना अनुभवका आधारमा सिचाङसँग सम्बन्धित कथा तथा अनुभूति साझा गरेका थिए।

आयोजकका अनुसार युवाको सिर्जनात्मक क्षमता र व्यावसायिक क्षेत्रका स्रोतलाई पर्यटन प्रवर्द्धनसँग जोडेर सिचाङको संस्कृति तथा पर्यटनबारे जानकारी दिने माध्यमलाई थप विस्तार गर्ने कार्यक्रमको उद्देश्य रहेको छ।

सिचाङ स्वायत्त क्षेत्रको संस्कृति तथा पर्यटन विभागका अनुसार ‘तीन प्रवेश’ श्रृंखला परम्परागत पर्यटन प्रवर्द्धनको ढाँचाभन्दा फरक रूपमा लक्षित समुदायसम्म पुग्ने प्रयास हो। यसअन्तर्गत विश्वविद्यालयका विद्यार्थी, विभिन्न व्यवसायमा कार्यरत व्यक्ति तथा समुदायका बासिन्दालाई सिचाङको संस्कृति, पर्यटन स्रोत, अमूर्त सांस्कृतिक सम्पदा र स्थानीय अनुभवसँग प्रत्यक्ष जोड्ने कार्यक्रम सञ्चालन भइरहेका छन्।

यो श्रृंखला गत जुनमा शुरु भएको हो र अक्टोबरसम्म सञ्चालन गर्ने योजना छ। यसअघि विश्वविद्यालय तथा व्यावसायिक क्षेत्र लक्षित कार्यक्रम आयोजना गरिएका थिए भने आगामी चरणमा चीनका विभिन्न प्रान्त तथा शहरका विश्वविद्यालय, व्यवसाय र समुदायमा सिचाङ पर्यटन प्रवर्द्धन कार्यक्रम सञ्चालन गर्ने तयारी छ।

ल्हासामा आयोजित पछिल्लो कार्यक्रममा युवाको दृष्टिकोणबाट सिचाङलाई बुझ्ने र प्रस्तुत गर्ने विषयसँगै व्यवसाय तथा सांस्कृतिक सिर्जनात्मक उद्योगलाई पर्यटनसँग कसरी जोड्न सकिन्छ भन्नेबारे पनि छलफल गरिएको थियो।

कार्यक्रम सिचाङ स्वायत्त क्षेत्रको संस्कृति तथा पर्यटन विभाग, शिक्षा विभाग, ट्रेड युनियन महासंघ तथा कम्युनिस्ट युथ लिगको सिचाङ क्षेत्रीय समितिले संयुक्त रूपमा आयोजना गरेका हुन्। सिचाङका सात शहर तथा प्रिफेक्चरका संस्कृति तथा पर्यटनसम्बन्धी निकायले पनि कार्यक्रममा सहकार्य गरेका थिए।

सिचाङले सन् २०२६ मा सांस्कृतिक तथा पर्यटन उद्योगलाई आर्थिक विकासको महत्वपूर्ण क्षेत्रका रूपमा विस्तार गर्दै पर्यटन प्रवर्द्धनमा सिर्जनात्मक माध्यम, डिजिटल प्रविधि, अमूर्त सांस्कृतिक सम्पदा र स्थानीय सांस्कृतिक उत्पादनको प्रयोग बढाउने नीति अघि सारेको छ। ल्हासाको पछिल्लो कार्यक्रमलाई त्यही नीतिअन्तर्गत युवा, व्यवसाय र समुदायलाई पर्यटन प्रवर्द्धनसँग प्रत्यक्ष जोड्ने प्रयासका रूपमा हेरिएको छ।