संयुक्त राष्ट्र शान्ति मिसनका लागि आसियानका महिला सैन्य अधिकृतलाई भारतमा विशेष तालिम
ड्रागन मिडिया समाचार कक्ष
भारतीय स्थल सेनाध्यक्ष जनरल धीरज सेठले संयुक्त राष्ट्र शान्ति मिसनमा महिलाको सहभागिता सुदृढ गर्ने उद्देश्यले नयाँ दिल्लीमा तालिम लिइरहेका आसियान सदस्य राष्ट्रका महिला सैन्य अधिकृतलाई सम्मान गरेका छन्।
संयुक्त राष्ट्र शान्ति स्थापना केन्द्रद्वारा आयोजित ‘आसियान–संयुक्त राष्ट्र महिला सैन्य अधिकृत पाठ्यक्रम’ मा सहभागी ११ आसियान महिला अधिकृत तथा भारतीय महिला सैन्य अधिकृतसँग अन्तरक्रिया गर्दै जनरल सेठले संयुक्त राष्ट्र शान्ति मिसनमा महिलाको भूमिका विस्तार गर्न उनीहरूले पुर्याइरहेको योगदानको प्रशंसा गरे।
यो पाठ्यक्रम अगस्ट १० देखि २१ सम्म नयाँ दिल्लीस्थित मानेकशा सेन्टरमा सञ्चालन भइरहेको छ। कार्यक्रममा सैन्य अधिकृतलाई संयुक्त राष्ट्र शान्ति मिसनमा परिचालन हुनुअघि आवश्यक व्यावसायिक तथा कार्यगत तालिम प्रदान गरिन्छ।
आसियान र भारतका महिला सैन्य अधिकृतलाई लक्षित उक्त कार्यक्रमको घोषणा भारतीय रक्षामन्त्रीले सन् २०२५ मा क्वालालम्पुरमा आयोजित तेस्रो भारत–आसियान रक्षा मन्त्रीस्तरीय बैठकका क्रममा गरेका थिए।
भारतीय सेनाका अनुसार कार्यक्रमले संयुक्त राष्ट्र शान्ति मिसनमा महिलाको सहभागिता वृद्धि गर्नुका साथै भारत र आसियानबीच रक्षा सहकार्य, क्षेत्रीय साझेदारी तथा क्षमता विकासलाई थप सुदृढ गर्ने लक्ष्य राखेको छ।
कार्यक्रममार्फत विभिन्न देशका महिला सैन्य अधिकृतबीच अनुभव आदानप्रदान, शान्ति मिसनसम्बन्धी व्यावसायिक दक्षता अभिवृद्धि तथा बहुराष्ट्रिय वातावरणमा कार्य गर्ने क्षमता विकासमा समेत जोड दिइएको छ।
