युक्रेनी ड्रोन आक्रमणमा रुसको रोस्तोभ क्षेत्रमा तीन जनाको मृत्यु
ड्रागन मिडिया समाचार कक्ष
रुसको दक्षिणी रोस्तोभ क्षेत्रमा युक्रेनी ड्रोन आक्रमण हुँदा तीन जनाको मृत्यु भएको छ भने एक जना घाइते भएका छन्।
रोस्तोभ क्षेत्रका गभर्नर युरी स्ल्युसारले रातभर भएको हवाई आक्रमणमा तीन जनाको मृत्यु भएको र एक घाइतेलाई अस्पताल भर्ना गरिएको जानकारी दिएका छन्।
उनका अनुसार युक्रेनी पक्षबाट गरिएको आक्रमणका क्रममा रोस्तोभ क्षेत्रका तीन शहर र नौ जिल्लामाथि आएका १५० भन्दा बढी मानवरहित हवाई वाहन नष्ट गरिएको छ।
स्ल्युसारले आफ्नो म्याक्स च्यानलमार्फत घटनाबारे जानकारी दिँदै आक्रमणबाट भएको क्षतिको थप विवरण संकलन भइरहेको बताएका छन्।
रुसी सुरक्षा निकायले पछिल्लो समय रोस्तोभसहित दक्षिणी तथा सीमावर्ती क्षेत्रमा आउने ठूलो संख्याका ड्रोनलाई हवाई प्रतिरक्षा प्रणालीमार्फत अवरोध गर्दै आएको छ।
