भकुण्डे प्रहरी चौकीका इन्चार्ज होटलबाट नियन्त्रणमा, अनुसन्धान जारी
ड्रागन मिडिया सम्वाददाता
काभ्रेपलान्चोकको नमोबुद्ध नगरपालिका–४ स्थित प्रहरी चौकी भकुण्डेका इन्चार्ज प्रहरी नायब निरीक्षक गणेशप्रसाद श्रेष्ठलाई स्थानीयले एक होटलबाट नियन्त्रणमा लिएर जिल्ला प्रहरी कार्यालय काभ्रेपलान्चोकमा बुझाएका छन्।
स्थानीयको दाबीअनुसार श्रेष्ठलाई मध्यरातमा नमोबुद्धस्थित एक होटलमा एक युवतीसँग रहेको अवस्थामा नियन्त्रणमा लिइएको थियो। त्यसपछि घटनाबारे प्रहरीलाई जानकारी गराइएपछि जिल्ला प्रहरी कार्यालय धुलिखेलबाट गएको टोलीले श्रेष्ठसहित दुई जनालाई नियन्त्रणमा लिएको हो।
जिल्ला प्रहरी कार्यालय काभ्रेपलान्चोकका प्रमुख प्रहरी उपरीक्षक रबिन कार्कीले स्थानीयबाट खबर आएपछि श्रेष्ठलाई जिल्ला प्रहरी कार्यालय ल्याइएको पुष्टि गरेका छन्।
“श्रेष्ठसहित दुईजना नै प्रहरी नियन्त्रणमा छन्, थप अनुसन्धान भइरहेको छ,” कार्कीले बताए।
स्थानीयले प्रहरी चौकीको जिम्मेवारीमा रहेका व्यक्तिले पदीय मर्यादाविपरीत गतिविधि गरेको आरोप लगाउँदै श्रेष्ठलाई नियन्त्रणमा लिएको बताएका छन्। यद्यपि घटनामा के कस्तो कानुनी वा विभागीय कसुर भएको हो भन्ने विषय अनुसन्धानबाट मात्र स्पष्ट हुने प्रहरीले जनाएको छ।
घटनामा संलग्न भनिएकी महिलाको पहिचान सार्वजनिक गरिएको छैन। घटनाको परिस्थितिबारे समेत प्रहरीले विस्तृत विवरण सार्वजनिक गरिसकेको छैन।
श्रेष्ठ गत जेठमा जिल्ला प्रहरी कार्यालय काभ्रेपलान्चोकबाट उत्कृष्ट प्रहरी घोषित भएको बताइएको छ। त्यसको केही महिनामै उनीमाथि पदीय आचरणसँग सम्बन्धित प्रश्न उठेपछि घटना थप चर्चामा आएको हो।
प्रहरीले घटनाको वास्तविक परिस्थिति, होटलमा उनीहरूको उपस्थितिको कारण तथा प्रहरी कर्मचारीको आचरणसम्बन्धी नियम उल्लंघन भएको हो वा होइन भन्ने विषयमा अनुसन्धान भइरहेको जनाएको छ।
अनुसन्धान पूरा नभएसम्म स्थानीयले लगाएका आरोपलाई पुष्टि भएको कसुरका रूपमा लिन नमिल्ने भएकाले प्रहरीको औपचारिक छानबिनपछि मात्रै घटनाको कानुनी तथा विभागीय अवस्था स्पष्ट हुने देखिएको छ।
