उद्धव थापामाथिको कारबाहीले राप्रपामा विवाद चर्कियो, कमल थापाले नेतृत्वमाथि उठाए प्रश्न
ड्रागन मिडिया सम्वाददाता
राष्ट्रिय प्रजातन्त्र पार्टीमा बागमती प्रदेश संसदीय दलका नेता उद्धव थापामाथि गरिएको कारबाहीलाई लिएर आन्तरिक विवाद चर्किएको छ। बिहीबार बसेको केन्द्रीय कार्यसम्पादन समितिको बैठकसमेत तनावपूर्ण बनेको विवरण सार्वजनिक भएको छ भने पूर्वअध्यक्ष कमल थापाले पार्टी नेतृत्वको कार्यशैलीमाथि गम्भीर प्रश्न उठाएका छन्।
राप्रपाले पार्टीको केन्द्रीय निर्णयविपरीत बागमती प्रदेशमा नेकपा एमालेका मुख्यमन्त्री उम्मेदवार किरण थापालाई समर्थन गरेको भन्दै उद्धव थापालाई पार्टी सदस्यता र प्रदेश सभा सदस्यबाट हटाउने प्रक्रिया अघि बढाउने निर्णय गरेको थियो।
पार्टी अध्यक्ष राजेन्द्र लिङदेनका अनुसार राप्रपाले प्रदेश सरकारमा सहभागी नहुने र कुनै पक्षलाई समर्थन नगर्ने निर्णय तथा निर्देशन दिए पनि उद्धव थापाले त्यसविपरीत एमालेका उम्मेदवारलाई समर्थन गरेका थिए। पार्टीले मागेको स्पष्टीकरणसमेत नबुझाएपछि अनुशासन समितिको सिफारिसमा कारबाहीको निर्णय गरिएको नेतृत्व पक्षको भनाइ छ।
तर पूर्वअध्यक्ष कमल थापा, अर्का पूर्वअध्यक्ष डा. प्रकाशचन्द्र लोहनी, वरिष्ठ उपाध्यक्ष विक्रम पाण्डे, बागमती प्रदेश अध्यक्ष विक्रम थापा र कार्यसम्पादन समिति सदस्य अर्जुन राईलगायत नेताले तत्काल निष्कासनको निर्णय नगर्न आग्रह गरेका थिए।
कमल थापाले शुक्रबार सार्वजनिक गरेको प्रतिक्रियामा बिहीबारको बैठकमा “केही असहज र अप्रिय परिस्थिति” निर्माण भएको र त्यसबाट आफू विरक्तिएको बताएका छन्।
उनका अनुसार असहमत पक्षले उद्धव थापामाथि कठोर निर्णय गर्नुअघि घटनाको अध्ययन, छानबिन र प्रदेश सभा सदस्यहरूसँग परामर्श गर्न कम्तीमा तीन दिन समय दिन प्रस्ताव गरेको थियो।
थापाले पार्टीले केन्द्र तथा प्रदेश सरकारमा विगतमा लिएको नीति, प्रदेश सभामा सभामुख र उपसभामुख पदमा भएको सहभागिता तथा यसअघि गरिएका अन्य राजनीतिक निर्णयको समेत समग्र समीक्षा गरेर मात्र अनुशासनको मापदण्ड तय गर्नुपर्ने धारणा राखेका छन्।
उनले नेतृत्वले ती सुझाव स्वीकार नगरी उद्धव थापालाई निष्कासन गर्ने निर्णय गरेको आरोप लगाएका छन्।
“कारबाही र निष्कासन मात्र समस्याको समाधान होइन। पार्टीभित्र गम्भीर संवादहीनताको अवस्था छ,” थापाले भनेका छन्।
उनले पार्टीभित्र “म नै पार्टी हुँ र मैले भनेकै हुनुपर्छ” भन्ने अधिनायकवादी सोच हाबी हुँदै गएको आरोपसमेत लगाएका छन्। कमजोर बन्दै गएको पार्टीलाई दम्भ र गुटबन्दीका आधारमा नभई सद्भाव, एकता, विधि र पद्धतिका आधारमा सञ्चालन गर्नुपर्ने उनको भनाइ छ।
यसैबीच, नेपाल प्रेसले स्रोतलाई उद्धृत गर्दै बिहीबारको बैठकमा कमल थापा र कार्यसम्पादन समिति सदस्य प्रेम श्रेष्ठबीच चर्काचर्की भएको र परिस्थिति झण्डै हात हालाहालको अवस्थामा पुगेको दाबी गरेको छ। उक्त घटनाको विस्तृत विवरण भने पार्टी वा सम्बन्धित दुवै नेताबाट औपचारिक रूपमा पुष्टि भएको छैन।
उद्धव थापामाथिको कारबाहीमा पार्टीका प्रभावशाली नेताहरू नै विभाजित भएपछि बागमती प्रदेश सरकारमा सहभागिताको विवाद अब राप्रपाको आन्तरिक नेतृत्व, निर्णय प्रक्रिया र अनुशासनसम्बन्धी बहसमा परिणत भएको देखिएको छ।
