नर्वेका राजा हाराल्ड पाँचौँको स्वास्थ्य बिग्रियो, रगतमा ब्याक्टेरियाको संक्रमण

ड्रागन मिडिया समाचार कक्ष

नर्वेका ८९ वर्षीय राजा हाराल्ड पाँचौँको स्वास्थ्य सप्ताहन्तमा अचानक बिग्रिएको छ। अस्पतालमा उपचाररत राजाको रगतमा ब्याक्टेरियाको संक्रमण देखिएको नर्वेजियन राजदरबारले जनाएको छ।

राजदरबारका अनुसार राजा हाराल्डलाई एन्टिबायोटिकमार्फत उपचार भइरहेको छ र उनले उपचारमा सकारात्मक प्रतिक्रिया दिएका छन्। स्वास्थ्य अवस्था बिग्रिए पनि हाल उनको अवस्था स्थिर रहेको जनाइएको छ।

राजा हाराल्डलाई अगस्ट १७ मा ओस्लो युनिभर्सिटी अस्पतालअन्तर्गतको रिक्सहोस्पिटालेतमा भर्ना गरिएको थियो। उनी पछिल्ला केही सातादेखि हेमोलाइटिक एनिमियाको उपचार गराइरहेका थिए।

हेमोलाइटिक एनिमिया शरीरमा रातो रक्तकोष सामान्यभन्दा छिटो नष्ट हुने अवस्था हो। यसको उपचारका क्रममा राजालाई कोर्टिसोन दिइएको थियो। त्यसपछि शरीरमा तरल पदार्थ जम्मा हुन थालेपछि उनलाई अस्पतालमा भर्ना गर्नुपरेको थियो।

अस्पतालमा उपचारकै क्रममा रगतमा ब्याक्टेरियाको संक्रमण देखिएपछि उनको स्वास्थ्य सप्ताहन्तमा थप बिग्रिएको हो। यद्यपि संक्रमणविरुद्ध दिइएको एन्टिबायोटिकले प्रभाव देखाएको र तत्काल अवस्था स्थिर रहेको राजदरबारले स्पष्ट पारेको छ।

राजा हाराल्ड हाल अस्पतालमै रहनेछन् र उनको स्वास्थ्य बिदा जारी रहनेछ। उनी बिरामी भएपछि युवराज हाकोनले राजप्रतिनिधिका रूपमा संवैधानिक जिम्मेवारी सम्हालिरहेका छन्।

हाराल्ड पाँचौँ सन् १९९१ देखि नर्वेका राजा छन्। उनी हाल युरोपका सबैभन्दा ज्येष्ठ सत्तासीन राष्ट्रप्रमुख हुन्।

पछिल्ला वर्षहरूमा उनले विभिन्न स्वास्थ्य समस्या सामना गर्दै आएका छन्। यसअघि पनि संक्रमणका कारण अस्पताल भर्ना भएका राजा हाराल्डलाई सन् २०२४ मा मुटुको स्थायी पेसमेकर जडान गरिएको थियो।

राजदरबारले राजाको स्वास्थ्य अवस्थाबारे आवश्यकताअनुसार थप जानकारी सार्वजनिक गर्ने जनाएको छ।