मध्यपूर्व र खाडी क्षेत्र फेरि ‘निर्णायक मोड’मा: वाङ यी
ड्रागन मिडिया समाचार कक्ष
चिनियाँ विदेशमन्त्री वाङ यीले मध्यपूर्व तथा खाडी क्षेत्रको वर्तमान परिस्थिति पुनः निर्णायक मोडमा पुगेको भन्दै सम्बन्धित पक्षलाई जतिसक्दो चाँडो संवाद र वार्ताको मार्गमा फर्कन आग्रह गरेका छन्।
चिनियाँ कम्युनिस्ट पार्टी केन्द्रीय समितिको राजनीतिक ब्युरोका सदस्यसमेत रहेका वाङले सोमबार बेइजिङमा कुवेतका विदेशमन्त्री शेख जर्राह जाबेर अल अहमद अल सबाहसँग भएको वार्ताका क्रममा उक्त धारणा व्यक्त गरेका हुन्।
वाङका अनुसार अहिलेको तत्काल प्राथमिकता क्षेत्रीय तनाव कम गर्नु र परिस्थितिलाई पुनः द्वन्द्वतर्फ जानबाट रोक्नु हो।
उनले मध्यपूर्व र खाडी क्षेत्रमा बारम्बार द्वन्द्व दोहोरिने अवस्था अन्त्य गरी स्थिरता र समृद्धितर्फ अघि बढ्नुपर्नेमा जोड दिए। मतभेद जतिसुकै गम्भीर भए पनि त्यसको समाधान युद्ध वा सैन्य टकरावबाट होइन, वार्ताको टेबलबाट खोज्नुपर्ने चीनको धारणा रहेको उनले बताए।
वाङले युद्धविराम र द्वन्द्व न्यूनीकरणतर्फ हासिल भएका उपलब्धिबाट पछि हट्न नहुने उल्लेख गर्दै सम्बन्धित पक्षले क्षेत्रका जनताको शान्ति र सुरक्षाको अपेक्षालाई प्राथमिकता दिनुपर्ने बताए।
चीनले कुवेतसँग समन्वय बढाउँदै मध्यपूर्व र खाडी क्षेत्रमा शान्ति तथा स्थिरता पुनःस्थापित गर्न सहयोग जारी राख्ने उनले बताए।
वार्तामा चीन र कुवेतबीचको द्विपक्षीय सम्बन्धबारे समेत छलफल भएको थियो। दुवै देशबीच कूटनीतिक सम्बन्ध स्थापना भएको ५५ वर्ष पुगेको अवसरमा राजनीतिक विश्वास, लगानी, ऊर्जा तथा अन्य व्यावहारिक सहकार्यलाई थप विस्तार गर्ने विषयमा जोड दिइएको छ।
कुवेती विदेशमन्त्रीले पनि क्षेत्रीय शान्ति तथा स्थिरता कायम गर्न चीनले निर्वाह गरिरहेको भूमिकाको प्रशंसा गर्दै बेइजिङसँग समन्वय थप सुदृढ गर्ने इच्छा व्यक्त गरेका छन्।
पछिल्लो समय मध्यपूर्वमा विकसित सुरक्षा तथा राजनीतिक घटनाक्रमका कारण क्षेत्रीय तनाव पुनः बढ्न सक्ने चिन्ता देखिएका बेला चीनले सैन्य विकल्पभन्दा संवाद, संयम र राजनीतिक समाधानलाई प्राथमिकता दिनुपर्ने आफ्नो धारणा दोहोर्याएको हो।
